Xitoyning Yanszi daryosi qirg‘og‘idagi qoya kutilmaganda diqqatga sazovor joyga aylandi: hozirda u yerga o‘nlab sayyohlar oqimi kuzatilmoqda. Buning sababi ijtimoiy tarmoq foydalanuvchilari hayratlanarli o‘xshashlikni aniqlaganida: qoyaning shakli itning boshiga o‘xshab ketadi.
Yanvar oyining oxirida shanxaylik dizayner Go Sinshan Xubey provinsiyasidagi tug‘ilib o‘sgan shahri Ichanga yaqin joyda sayr qiladi. Keyinchalik suratlarni ko‘zdan kechirayotganda, u tasvirga olgan tog‘ g‘amgin kuchukchaga o‘xshab ketishini payqaydi.
Qizig‘i shundaki, Go ilgari bu o‘xshashlikni hech qachon sezmagandi. Sinshan bu kadrni Xitoyning RedNote (asl nomi — Xiaohongshu) ijtimoiy tarmog‘ida ulashishga qaror qilib, qoyani “Kuchukchalar qoyasi” deb atadi.
“Bu juda ajoyib va yoqimli edi. Buni ko‘rganimda juda hayajonlanib, xursand bo‘lib ketdim. Kuchukcha xuddi suv ichayotgandek yoki baliqlarni kuzatayotgandek holatda edi. Bundan tashqari, u go‘yoki Yanszi daryosini sokin tarzda qo‘riqlayotganga o‘xshardi”, deb ta’kidladi Go.
Ijtimoiy tarmoqning boshqa foydalanuvchilari ham o‘xshashlikni payqashdi — 10 kun ichida Goning posti 120 ming layk to‘pladi. Weibo platformasida esa #xiaogoushan xeshtegi millionlab marta ko‘rildi.
Foydalanuvchilar o‘z itlarini qoya tasvirlari bilan solishtirishni boshladilar. Boshqalari esa to‘g‘ridan to‘g‘ri Ichanga borib, uy hayvonlarini tog‘ fonida suratga tushirmoqda.
Izoh (0)