O‘zbekiston musulmonlari idorasi raisi Nuriddin Xoliqnazarov raisligida Surxondaryo, Samarqand hamda Toshkent viloyatlaridagi bosh imom-xatiblari ishtirokida videomuloqot yig‘ilishi bo‘lib o‘tdi. Bu haqda Musulmonlar idorasi matbuot xizmati xabar berdi.
Yig‘ilishda tashkiliy masalalar ko‘rildi. Surxondaryo viloyati bosh imom-xatibi Aliakbar Sayfuddinov o‘z arizasiga ko‘ra vazifasidan ozod etilib, Termiz shahridagi “Hakim Termiziy” jome masjidi imom-xatibi vazifasida qoldirildi.
Termiz shahri bosh imomi va “Manguzar” jome masjidi imom-xatibi lavozimida ishlab kelayotgan Rasuljon Abdullayev Surxondaryo viloyati bosh imom-xatibi vazifasiga tayinlandi.
Toshkent shahar Mirzo Ulug‘bek tumani “Oltintepa” masjidida imom-xatib bo‘lib ishlab kelayotgan Ahmadxon Alimov Samarqand viloyati bosh imom-xatibi etib tayinlandi. Ushbu vazifani vaqtincha bajarib kelgan Yoqubjon Mansurov bosh imom-xatib o‘rinbosari va Samarqand tumani “Xo‘ja Ahrori Valiy” jome masjidi imom-xatibi vazifasida qoldirildi.
Toshkent viloyati bosh imom-xatibi Jasurbek Raupov ham o‘z ixtiyori bilan lavozimidan ozod etilib, Zangiota tumanidagi “Zangiota” jome masjidi imom-xatibi vazifasida qoldirildi.
Toshkent tumani bosh imomi va mazkur tumandagi “Hasanboy ota” jome masjidi imom-xatibi vazifasida ishlab kelayotgan Doniyor Ikromov Toshkent viloyati bosh imom-xatibi lavozimiga tayinlandi.
Izoh (0)