Litvaning Shyaulyay shahrida joylashgan “Vishinskiy” mehmonxonasida o‘zbekistonlik erkak ikki kishini pichoqlagani haqida xabarlar tarqaldi. O‘zbekistonning Latviyadagi elchixonasi buni rad etdi.
“Elchixona tomonidan Litvaning vakolatli idoralari bilan olib borilgan o‘rganishlar natijasida Shyaulyay shahrida joylashgan “Vishinskiy” mehmonxonasida O‘zbekiston fuqarolari bilan bog‘liq bunday holat yuz bermagani aniqlandi”, deyiladi xabarida.
Elchixona tasdiqlanmagan ma’lumotlarni internet tarmoqlari orqali tarqatmaslikni so‘radi.
2024-yil iyulida Polshaning Varshava shahrida 26 yoshli o‘zbekistonlik yigit 15 yoshli ukrainalik ikki o‘smirga pichoq bilan hujum qilgani haqida xabar berilgan edi. “Daryo” muxbiri O‘zbekistonning Polshadagi elchixonasi bilan bog‘lanib holatga aniqlik kiritganida o‘zbekistonlik yigit ayblanuvchi emas, u jabrlanuvchi bo‘lib chiqqandi. To‘rt nafar ukrainalik o‘zbekistonlik fuqaroni talon-toroj qilish maqsadida unga hujum qilgan.
O‘sha yilning iyulida Nyu Yorkning Bruklin shahrida o‘zbekistonlik oila (qaynona, kelin va ikki nevarasi) pichoqlab ketilgandi. Qotillikda gumonlanib, 24 yoshli qarindoshi qo‘lga olingan. U ruhiy xasta deb topilgandi.
2024-yil mart oyida Nyu Yorkda xotinini pichoqlab, jarohat yetkazgan o‘zbekistonlik erkakni politsiya otib tashlagandi. Hodisa 8-mart xalqaro xotin-qizlar kuni munosabati bilan o‘tkazilayotgan ziyofat chog‘ida yuz bergan.
Izoh (0)