“Ekologik ekspertiza, atrof-muhitga taʼsirni baholash va strategik ekologik baholash to‘g‘risida”gi qonun imzolandi.
Ushbu qonun Qonunchilik palatasi tomonidan 2024-yil 18-oktyabrda qabul qilinib, Senat tomonidan 2025-yil 24-yanvarda ma’qullangandi. Qonunning maqsadi ekologik ekspertiza, atrof-muhitga ta’sirni baholash va strategik ekologik baholash sohasidagi munosabatlarni tartibga solishdan iborat. Unda atrof-muhitga taʼsirni baholashda jamoatchilikning ishtiroki haqidagi normalar ham belgilanmoqda.
Atrof-muhitga ta’sirni baholash — mo‘ljallanayotgan yoki rejalashtirilayotgan yoki amalga oshirilayotgan xo‘jalik faoliyatining hamda boshqa faoliyatning atrof-muhitga ta’siri xususiyatlarini va darajasini, uning ehtimoliy ekologik oqibatlarini aniqlashga hamda atrof-muhitni muhofaza qilish va tabiiy resurslardan oqilona foydalanish chora-tadbirlarini ishlab chiqarishga qaratilgan tartib-tamoil.
Ekologik ekspertiza davlat va jamoat ekologik ekspertizasi tarzida amalga oshiriladi.
Jamoat ekologik ekspertizasi ekologik jihatdan asoslantirush talab etiladigan har qanday faoliyat sohasida nodavlat notijorat tashkilotlarining va fuqarolarning tashabbusi bilan amalga oshirilishi mumkin. Jamoat ekologik ekspertizasini amalga oshirishga monelik qilish taqiqlanadi. Jamoat ekologik eskpertizasi davlat ekologik ekspertizasi o‘tkazilishidan qat’I nazar amalga oshirilishi mumkin.
Jamoat ekologik ekspertizasi qonunchilikda belgilangan tartibda amalga oshiriladi va bunday ekspertiza xulosasi tavsiyaviy xususiyatga ega bo‘ladi.
Mo‘ljallanayotgan va rejalashtirilayotgan yoki amalga oshirilayotgan xo‘jalik hamda boshqa faoliyatning maqsadga muvofiqli to‘g‘risida qaror qabul qilishga taalluqli masalalarni muhokama qilish uchun jamoatchilik eshituvi ham tashkil etiladi. Jamoatchilik eshituvlari davlat ekologik ekspertizasi o‘tkazilgunga qadar tashkil etiladi.
Jamoatchilik eshituvlarini tashkil etish uchun maxsus vakolatli davlat organi atrof-muhitga ta’sirni baholash bo‘yicha barcha materiallar kelib tushgan kundan e’tiboran 3 kun ichida
- muhokama qilinadigan masala o‘z huquqlariga va qonuniy manfaatlariga daxl qiladigan yoki qilishi mumkin bo‘lgan shaxslar doirasini hamda atrof-muhitga va aholiga sezilarli ta’sir ko‘rsatishi mumkin bo‘lgan xo‘jalik faoliyati hamda boshqa faoliyat mo‘ljallanayotgani va rejalashtirilayotgani yoki amalga oshirilayotgan hududni belgilaydi;
- mahalliy ijro etuvchi hokimiyat organlariga va tashabbuskorga atrof-muhitga ta’sirni baholashga doir tegishli axborotni jamoatchilik eshituvlari tashkil etilishi haqidagi xabarnoma bilan birga yuboradi.
Jamoatchilik eshituvlarining natijalari yakuniy hujjatlar bilan birga maxsus vakolatli davlat organining va jamoatchilik eshituvlari o‘tkazilgan hududdagi ijro etuvchi hokimiyat organining rasmiy saytlarida e’lon qilinadi.
Qonun 2025-yil 25-avgustdan kuchga kiradi. Ushbu qonun fuqarolarning qulay atrof-muhitga va bu haqida ishonchli axborotga ega bo‘lish huquqini taʼminlashga xizmat qiladi, ekologik ekspertiza xulosasini berish tartib-taomillarini samarali va to‘g‘ridan to‘g‘ri tartibga soluvchi normalar amaliyotga kiritilishiga asos bo‘ladi.
Avvalroq “Atrof-muhit bilan bog‘liq bo‘lgan masalalar bo‘yicha qarorlar qabul qilish jarayonida jamoatchilikning axborot olish imkoniyati, ishtiroki va odil sudlovga erishish imkoniyati to‘g‘risidagi konvensiyaga O‘zbekiston Respublikasining qo‘shilishi haqida”gi qonun ko‘rib chiqilib, ma’qullangani haqida xabar berilgan edi. Mazkur konvensiya insonning sog‘lom atrof-muhitga bo‘lgan huquqlarini himoya qilishga qaratilgan muhim xalqaro hujjat hisoblanadi.
Izoh (0)