Ispaniya terma jamoasi va “Barselona” klubining sobiq futbolchisi Andres Inyesta o‘zining eng sevimli besh futbolchisini sanadi.
Sportskeeda nashrining xabariga ko‘ra, sobiq yarim himoyachi Xosep Gvardiola, Xavi, David Silva, Santi Kasorla va Mikael Laudrupni tanlagan. Inyesta futbolchilar orasiga Messini qo‘shmagan. Argentinalik futbolchi Inyesta bilan ko‘p yillar davomida “Barselona”da birgalikda faoliyat yuritgan.
Ma’lumot uchun, Andres Inyesta 1996-yildan 2018-yilgacha “Barselona” tizimida bo‘ldi. Bu davr mobaynida u asosiy jamoa safida 674 ta o‘yinda maydonga tushib, 57 ta gol va 136 ta golli uzatmaga mualliflik qildi. Shuningdek, Inyesta Yaponiya klubi “Vissel Kobe”da ham to‘p surdi va u yerda barcha musobaqalarni qo‘shib hisoblaganda, 134 ta o‘yin o‘tkazib, 26 ta gol urdi hamda 25 ta golli uzatmani amalga oshirdi. Uning so‘nggi klubi BAAning “Emirates” jamoasi bo‘lib, u yerda 23 ta o‘yinda maydonga tushib, besh marta raqib darvozasini ishg‘ol qildi.
Ispaniya terma jamoasi tarkibida Inyesta ikki marta Yevropa chempioni bo‘lgan va Jahon chempionatida g‘alaba qozongan.
Izoh (0)