“Galatasaroy” klubi “Fenerbahche” ustozining irqchilikka oid bayonotlari bo’yicha prokuraturaga ariza topshiradi hamda UEFA va FIFA’ga rasmiy shikoyat yuboradi. Bu haqda klub matbuot xizmati xabar berdi.
Futbol bo‘yicha Turkiya chempionatining 25-turidan o‘rin olgan “Galatasaroy” — “Fenerbahche” uchrashuvi 25-fevral kuni bo‘lib o‘tdi va tomonlar 0:0 hisobida durang o‘ynadi.
O‘yindan so‘ng mehmonlar ustozi Joze Mourinyo bildirgan fikrlar ko‘plab muhokamalarga sabab bo‘lmoqda.
“Men hakamga rahmat aytishim kerak. Bahsli vaziyatlarda raqib o‘rindig‘ida o‘tirganlarning hammasi maymundek sakrashdi. Agar o‘yinni turkiyalik hakam boshqarganida, uchrashuv umuman boshqacha tarzda o‘tgan bo‘lardi”, dedi portugaliyalik mutaxassis.
Galatasaroy klubi portugaliyalik mutaxassis ustidan UEFA va FIFA’ga shikoyat qilishini ma’lum qildi.
“Fenerbahche” bosh murabbiyi Joze Mourinyo Turkiyada ishlay boshlaganidan beri turk xalqiga nisbatan kamsituvchi fikrlarni muntazam bildirib keladi. Endi esa u o’zining axloqsiz bayonotlariga insoniylikdan yiroq gaplarini ham qo’shdi. Shuni ma’lum qilamizki, Mourinyoning irqchilikka oid so’zlari bo’yicha prokuraturaga ariza beramiz hamda UEFA va FIFA’ga shikoyat yo’llaymiz”, deyiladi klub bayonotida.
Ma’lumot uchun, 62 yoshli Mourinyo 2024-yil iyun oyidan beri “Fenerbahche”ni boshqarib kelmoqda. Uning boshqaruvida jamoa ayni payt 58 ochko bilan 2-o‘rinda ketmoqda. “Galatasaroy” esa 64 ochko to‘plagan holda turnir jadvalida yetakchilik qilmoqda.
Izoh (0)