Kecha, 24-fevral kuni Milliy matbuot markazida Mikrokreditbankning 2024-yildagi yillik sarhisobi va 2025-yilda amalga oshirilayotgan ishlari bo‘yicha matbuot anjumani bo‘lib o‘tdi. Tadbirda hunarmandchilik hamda kasanachilikni qo‘llab-quvvatlash orqali kichik biznes, xususiy va yakka tartibdagi tadbirkorlikni rivojlantirish, yangi ish o‘rinlarini yaratish hamda qishloq joylarda mikromoliyaviy xizmatlarni kengaytirish masalalari muhokama qilindi.
Kredit olish jarayonlari soddalashtirildi
Ijtimoiy dasturlarni amalga oshirish departamenti direktori o‘rinbosari Bobur Rajapov bank tomonidan ishlab chiqilgan “Mavrid” ilovasi haqida ma’lumot berdi. Uning so‘zlariga ko‘ra, ushbu ilova orqali joriy yilda “Oila krediti” platformasi integratsiya qilindi.
“Endilikda mijozlar bankka borishga hojat qoldirmay, ilova orqali kredit olish arizasini topshirishlari va barcha jarayonlarni masofadan turib amalga oshirishlari mumkin. Bu orqali ortiqcha ovoragarchiliklarning oldi olindi” , — dedi Rajapov.
Bundan tashqari, aholiga xizmatlarni tanishtirish maqsadida mahalla agentlari va banklarga qo‘llanmalar, buklet hamda flayerlar tarqatildi.
Muammoli kreditlar va kiberxavfsizlik bo‘yicha islohotlar
Matbuot anjumanida muammoli kreditlarni qaytarish bo‘yicha Mikrokreditbank tomonidan amalga oshirilgan choralar ham muhokama qilindi. Mutaxassislarning ta’kidlashicha, bank tuzilmasida maxsus xizmat ko‘rsatuvchi guruhlar tashkil etilib, ular malakali kadrlar bilan to‘ldirildi. O‘tgan yilgi ko‘rsatkichlar bilan solishtirilganda, joriy yilning dastlabki ikki oyida samarali natijalarga erishilgan.
Shuningdek, Chakana biznes departamenti mutaxassisi Shaxboz Abdug‘aniyev kiberxavfsizlik va bank tizimida amalga oshirilayotgan yangi xavfsizlik choralari haqida ma’lumot berdi. Bank kartalarida xavfsiz tranzaksiyalarni ta’minlash uchun Visa kartalarida 3D Secure kod tizimi joriy etildi.
“Agar mijoz o‘z shaxsini tasdiqlamagan bo‘lsa, kartalar orqali pul o‘tkazmalari amalga oshirilmaydi. Har bir tranzaksiya mijozning shaxsiy identifikatsiyasidan so‘ng amalga oshiriladi” , dedi mutaxassis.
Mahallabay ish olib borish va bandlikni ta’minlash
Mahallabay ishlash va hududiy loyihalarni boshqarish departamenti direktori G‘olib Sanoyevning ta’kidlashicha, Prezident Shavkat Mirziyoyev raisligida 2024-yil 16-dekabr kuni o‘tkazilgan videoselektor yig‘ilishida belgilangan chora-tadbirlar doirasida Mikrokreditbank zimmasiga 2025-yilda 320 ming nafar aholini bandligini ta’minlash vazifasi yuklatilgan.
Ushbu maqsadga erishish uchun mahalla tizimi doirasida yangi mexanizmlar yo‘lga qo‘yildi. Xususan, bugungi kunda Mikrokreditbank tomonidan 332 ta mahalla banki faoliyati tashkil etilib, ularga 1121 ta mahalla biriktirilgan. Mazkur mahallalarda aholining moliyaviy savodxonligini oshirish va tadbirkorlik loyihalarini moliyalashtirish bo‘yicha ishlar olib borilmoqda.
G‘olib Sanoyevning ta’kidlashicha, 2025-yilning dastlabki ikki oyida 51 ming nafar aholi bandligi ta’minlangan. Ulardan 18 ming nafari doimiy ishga joylashtirilgan, qolganlari esa tadbirkorlik faoliyatiga jalb qilingan. Bank tomonidan ushbu maqsadlar uchun bir trillion so‘mdan ortiq kredit mablag‘lari ajratilgan.
Mikrokreditbank 2024-yilda qator muhim yutuqlarga erishgan bo‘lsa, 2025-yilda esa yanada keng qamrovli islohotlarni amalga oshirishni rejalashtirmoqda. Bankning asosiy maqsadi – aholining tadbirkorlik bilan shug‘ullanishi uchun qulay moliyaviy sharoit yaratish, kredit olish jarayonlarini soddalashtirish va yangi ish o‘rinlarini tashkil etishdan iborat.
Reklama huquqi asosida.
Izoh (0)