Ijtimoiy tarmoqlarda tezlikni oshirish qoidabuzarligi (radar) uchun jarima miqdori oshirilgani haqida xabarlar tarqalmoqda. “Daryo” mazkur xabarlar yuzasidan IIBB axborot xizmati bilan bog‘landi.
Boshqarma bergan maʼlumotga ko‘ra, ushbu maʼlumotlar haqiqatga to‘g‘ri kelmaydi. Bu turdagi qoidabuzarlik jarimalari oshirilmagan. Axborot tarqatishda rasmiy manbalarga asoslanishni tavsiya etamiz, deya qo‘shimcha qilingan.
Yangi qonun bilan tezlik uchun jarima miqdorlari oshirilgani yo‘q. Hozirda belgilangan tezlikdan 20 gacha oshirilsa — 1 baravar, 40 gacha oshirilsa — 5 baravar, 40 dan oshirilsa — 9 baravar miqdorida jarima to‘lanadi.
Bundan avval O‘zbekistonda jarima ballari 12 balldan oshgan haydovchilar transport vositasini boshqarish huquqidan mahrum qilinishi belgilangani haqida xabar berilgan edi.
Haydovchilar uchun jarima ballari tizimi
O‘zbekistonda haydovchilar huquqbuzarliklari uchun jarima ballari tizimi joriy etilishi haqida 2022-yilning fevralida o‘tkazilgan videoselektor yig‘ilishida ma’lum qilingandi. O‘sha yilning aprelida “Avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish chora-tadbirlari to‘g‘risida”gi prezident qarori qabul qilindi. Unda har bir yo‘l harakati qoidabuzarligi uchun 12 oy davomida alohida jarima ballari hisoblab borilishi belgilandi.
Mazkur tizim 2022-yil 1-dekabrda ishga tushishi kerak edi. YHXX bu tizim ko‘zda tutilgan sanadan boshlab test rejimida ishga tushurilishini, dasturiy ta’minot sinovdan o‘tkazilib, aniqlangan xato va kamchiliklar to‘liq bartaraf etilgandan keyin ishga tushirilib, haydovchilar tomonidan sodir etilgan qoidabuzarliklar uchun jarima ballari hisoblanishini bildirgandi. O‘shanda Vazirlar Mahkamasi qaror loyihasi ishlab chiqilgani, Oliy Majlis qonunchilik palatasining mas’ul xodimlari bilan hamkorlikda ishchi guruh tuzilgan holda qonun loyihasini qayta takomillashtirish ishlari olib borilayotgani ma’lum qilingandi.
Qonunchilik palatasi jarima ballari ko‘zda tutilgan qonunni 2023-yil 28-noyabrda qabul qildi. Senatda birinchi marta 2024-yil 16-avgustda kuni ko‘rib chiqilib, uni takomillashtirish va yakunlash uchun Senat va Qonunchilik palatasining kelishuv komissiyasiga qaytarildi. 2025-yil 24-yanvarda qonun qayta ko‘rib chiqilib, ma’qullandi.
Izoh (0)