Hindistonda futbol o‘yini boshlanishidan oldin petardalar portlashi oqibatida 30 dan ortiq odam jarohatlandi. Bu haqda politsiyaga tayanib, NDTV xabar berdi.
Politsiya ma’lumotlariga ko‘ra, voqea 17-fevral, dushanba kuni sodir bo‘lgan. Futbol maydonida petardalardan foydalanilgan, ular portlab, tomoshabinlar o‘tirgan joylarga uchib ketgan. Barcha jabrlanganlar yaqin oradagi shifoxonaga yetkazilgan. Jiddiy jarohat olganlar haqida xabar berilmagan. Politsiya holat yuzasidan tekshiruv olib bormoqda.
4-fevral kuni Xitoyda bir bola kanalizatsiyaga petarda uloqtirgandi. Qqibatda metan portlab, avtoturargohda turgan sakkizta mashinaga zarar yetgan. Transport vositalariga yetkazilgan zarar 285 ming yuan (deyarli 40 ming dollar) ga baholangan. Qurbonlar va jarohatlanganlar haqida xabar berilmagan.
Hindistonda kuzatilgan so‘nggi baxtsiz hodisalar
♦ 15-fevral kuni Nyu Dehli shahridagi temiryo‘l vokzalida sodir bo‘lgan tiqilinchda kamida 18 kishi, jumladan, 11 ayol va besh bola halok bo‘ldi. 14-raqamli temiryo‘l platformasida Prayagraj Express poyezdining jo‘nashini ko‘p sonli odamlar kutib turgan. Ular Maha Kumbha diniy festivaliga borish uchun poyezdlarga chiqishga shoshilgan.
♦ Yanvar oyida aynan Maha Kumbhu diniy festivalidagi tiqilinch sabab 40 kishi halok bo‘lgandi. Dunyodagi eng yirik festivalda 400 million kishi ishtirok etishi kutilgandi. Tiqilinch oqibatida 60 kishi jarohatlangan. Festivalning asosiy marosimi — suvda cho‘milish bo‘lib, bu nafaqat tanani, balki ruhni ham gunohlardan poklaydi, deb ishoniladi.
Ziyoratchilar Gang daryosiga kirishda navbatlarini kutib o‘tirgan, to‘satdan tartibsizlik va tirbandlik yuzaga kelgan. Olomon daryo qirg‘og‘iga qarab yo‘l olgan, odamlar yiqila boshlagan. Falokatga qaramay, festival davom etgan. Har 12 yilda bir marta o‘tkaziladigan bu tadbir 45 kun davom etadi.
Izoh (0)