Ijtimoiy tarmoqlarda Farg‘onadagi maktablarning birida o‘qituvchi ayol dars vaqtida o‘quvchilardan birini kaltaklagani aks etgan video tarqaldi. “Millar” dasturida holat yuzasidan ma’lumot berildi.
Qayd etilishicha, holat ijtimoiy tarmoqlarda aytilgan Marg‘ilon shahridagi 2-maktabda emas, balki 11-maktabda 2024-yili dekabr oyida sodir bo‘lgan. Maktabning 8-“A” sinf rahbari S.D. o‘quvchisi T.M.ni muntazam darslarga kirmay yurgani, ko‘p sho‘xlik qilgani va o‘qituvchilarning shikoyatlari sababli koyib, tanbeh bergan va tartibga chaqirgan.
O‘quvchiga ustozining so‘zlari yoqmagan va unga nisbatan hurmatsizlik qilib, qo‘pol so‘zlar bilan gap qaytargan. O‘qituvchi esa o‘zini tutolmay, asabiy holatda o‘quvchiga qo‘l ko‘targan.
Ushbu voqea maktab jamoasida muhokama qilingan. Muallima o‘zining xatti-harakatidan afsusdaligini, bunday holat qaytarilmasligini bildirgan. Maktab rahbariyati o‘qituvchiga pedagogga xos bo‘lmagan harakatlarni sodir etgani uchun 2024-yili 28-dekabr kuni tegishli tartibda intizomiy jazo chorasini qo‘llagan.
Maktabdagi janjallar
Avvalroq Sirdaryoda o‘qituvchi 1-sinf o‘quvchisini qo‘liga igna sanchish bilan jazolangani haqida xabarlar tarqalgandi. Surishtiruv davomida yuqoridagi holat tasdig‘ini topmagan.
Qashqadaryoning Shahrisabz tumanidagi maktabda o‘qituvchi 5-sinf o‘quvchisini urib jarohatladi. Qarshi shahridagi maktabda o‘qituvchi va o‘quvchi yoqalashgani tasvirlari tarqaldi. Algebra fani o‘qituvchisi va 10-sinf o‘quvchisi bo‘lgan ikki qiz o‘rtasida o‘zaro kelishmovchilik kelib chiqib, og‘zaki tortishib qolgan. Ularning xatti-harakatlariga chora ko‘rish uchun sudga berilgan.
Toshkentdagi maktabda ayol dastlabki ish kunida o‘quvchini kaltaklagani ham keng muhokamalarga sabab bo‘lgandi. Ayol jazolanib, maktab direktori ishdan olingandi.
Tanganing ikkinchi tomoni: o‘qituvchiga tazyiq o‘tkazish holatlari
2024-yilning oktyabrida Sirdaryo tumanidagi 2-maktabda ikki o‘quvchi qiz o‘qituvchini urgandi. O‘sha yilning aprelida Farg‘onada maktab o‘qituvchisi o‘quvchining qarindoshlari tomonidan kaltaklangandi. 2023-yilning mayida Farg‘ona viloyati Toshloq tumanidagi maktabning boshlang‘ich sinf o‘qituvchisi o‘quvchisining onasi tomonidan kaltaklangandi. Sentyabr oyida Surxondaryoda maktab direktori o‘qituvchining yaqin qarindoshlari tomonidan kaltaklangandi. Mazkur holatlar yuzasidan huquqbuzarlarga qilmishidan kelib chiqqan holda jazo choralari ko‘rilgan.
Izoh (0)