Prezidentning “Tomorqa yer egalari va dehqon xo‘jaliklari faoliyatida zamonaviy tashkiliy tizimni joriy qilish va moliyaviy qo‘llab-quvvatlashning qo‘shimcha chora-tadbirlari to‘g‘risida”gi farmoni qabul qilindi. Bu haqda Adliya vazirligi xabar berdi.
Farmonga ko‘ra, Dehqon xo‘jaliklari va tomorqa yer egalari faoliyatini qo‘llab-quvvatlash jamg‘armasi mablag‘lari hisobidan bir qator moliyaviy qo‘llab-quvvatlash tartiblari joriy etiladi.
Jumladan, har yili 500 ta mahallada bittadan aholi tomorqasida amalga oshirilgan eng namunali va innovatsion loyiha uchun BHMning 100 baravaridan (37,5 mln so‘m) oshmagan miqdorda grantlar ajratiladi.
Shuningdek, usta dehqonlar tomonidan qisqa muddatli o‘quv kurslarini tashkil etish bilan bog‘liq xarajatlarni qoplash uchun har bir kurs uchun BHMning 15 baravarigacha (5 mln 625 ming so‘m) miqdorda subsidiya ajratiladi.
Shu bilan birga, muayyan mahalladagi 50 foiz xonadonlarning tomorqasida eksportbop mahsulot yetishtirishni yo‘lga qo‘yib bergan usta dehqonlarga 100 mln so‘mgacha subsidiya ajratiladi.
Bundan tashqari, tomorqa yer egalari va dehqon xo‘jaliklari hamda ularga xizmat ko‘rsatuvchi subyektlarga tijorat banklari orqali qishloq xo‘jaligi mahsulotlarini yetishtirish, ularni qayta ishlash, quritish, saqlash va qadoqlash loyihalari uchun 2 yilgacha imtiyozli davr bilan 7 yilgacha muddatga Markaziy bank asosiy stavkasidan 4 foizlik punkt yuqori stavkada (shundan 5 foiz bank marjasi) kreditlar ajratiladi.
Aholi tomorqalari va ijara yerlarida ixcham muzlatkichli omborxonalar, qadoqlash, quritish va qayta ishlash uskunalari, tayyor holdagi issiqxonalar 24 oylik imtiyozli davr bilan 5 yilda bo‘lib to‘lash sharti bilan lizingga beriladi.
Avvalroq farmon bilan Kambag‘allikni qisqartirish va bandlik vazirligiga qo‘shimcha vazifa va funksiyalar yuklangani haqida xabar berilgandi.
Qishloq xo‘jaligi O‘zbekiston iqtisodiyotining 25 foizini tashkil qiladi. Fermerdan tortib oddiy ishchigacha millionlab insonlar band bo‘lgan ushbu soha mamlakatimiz oziq-ovqat xavfsizligi uchun juda muhim. Shu bois ham so‘nggi yillarda qishloq xo‘jaligi bilan bog‘liq jiddiy islohotlar olib borilmoqda.
Avvalroq O‘zbekistonda qishloq xo‘jaligi mahsulotlari yetishtiruvchilarga suv yetkazib berish xizmatlari uchun to‘lovlar bekor qilinishi aytilgandi.
Izoh (0)