Ilon Maskning X ijtimoiy tarmog‘i AQSH prezidenti Donald Trampga 2021-yil 6-yanvarda uning tarafdorlari Kapitoliyga bostirib kirganidan keyin siyosatchining ijtimoiy tarmoqlardagi akkauntlari bloklanganidan keyin bergan da’vosini hal qilish uchun 10 million dollar to‘laydi. Bu haqda Reuters xabar berdi.
Meta Trampga 25 million dollar to‘ladi
X Trampning akkauntlari bloklanganidan keyin u bilan kelishuvga erishgan ikkinchi platforma bo‘ldi. O‘tgan oyda Mark Sukerbergning Meta Platforms kompaniyasi xuddi shunday bitim doirasida AQSH prezidentiga 25 mln dollar to‘lashga rozi bo‘lgandi. O‘shanda Trampning advokati Jon Koul bunday kelishuv prezident va Sukerberg o‘rtasidagi muzokaralar natijasida erishilganini aytgan.
Kelishuv doirasida Meta Trampning prezidentlik kutubxonasi qurilishi uchun 22 million dollar o‘tkazadi, qolgan 3 millionni AQSH prezidenti bilan birga da’vo arizasi bergan da’vogarlar oladi.
Trampning ijtimoiy tarmoqlarga qarshi da’volari
2021-yilda siyosatchi boshqa bir qancha da’vogarlar bilan birgalikda Facebook, Twitter (hozirgi X) va Alphabet (Google va uning sho‘ba korxonalarini boshqaradigan xolding kompaniyasi) ijtimoiy tarmoqlardagi akkauntlari bloklangani uchun sudga murojaat qilgandi.
Trampning Facebook, Instagram, YouTube (Google’ga tegishli) va Twitter’dagi akkauntlari 2021-yil yanvarida uning tarafdorlari prezidentlik saylovlari natijalaridan norozi bo‘lib, Kapitoliy binosiga bostirib kirganidan keyin bloklangan. Uning Facebook sahifasi eas 2023-yilda blokdan chiqarilgan va X akkaunti 2022-yilda qayta tiklangandi.
Izoh (0)