2020-yildan buyon yoshi kichraytirilgan 8 nafar futbolchi aniqlandi, deb xabar bermoqda O‘zbekiston Professional futbol ligasi.
Maʼlum qilinishicha, O‘zPFL 2020-yildan buyon Adliya organlari bilan hamkorlikda ishlab, har mavsum so‘ngida o‘zining ilk professional mehnat shartnomasini imzolagan futbolchilar ro‘yxatini shakllantiradi va ular orasidan yoshi kichraytirilgan futbolchilarni aniqlaydi.
Shu tartibga asosan, O‘zPFL 2024-yilgi mavsumda ilk professional shartnomasini imzolagan futbolchilar ro‘yxatini Adliya organlariga taqdim etgan.
Aniqlanishicha, ro‘yxatda mavjud bo‘lgan 364 nafar futbolchidan faqatgina bir nafarida bu kabi muammo mavjud. Yaʼni, futbolchi aslida 2004-yil tug‘ilgan bo‘lsada, uning 2006-yilda tug‘ilganligini tasdiqlovchi hujjat O‘zPFL ro‘yxatidan o‘tkazilgan.
Adliya vazirligi mazkur xulosani taqdim etgach, O‘zPFL futbolchini ro‘yxatdan o‘tkazgan klubdan uning tegishli hujjatlarini haqiqiy tug‘ilgan yili bo‘yicha qonun doirasida rasmiylashtirishni 7-fevralga qadar amalga oshirishni talab qilgan va uning hujjatlari haqiqiy tug‘ilgan yili bo‘yicha rasmiylashtirilgan.
O‘zPFL 2020-yildan buyon bir qator futbolchilarni o‘z hujjatlarini haqiqiy tug‘ilgan yili bo‘yicha rasmiylashtirilishiga erishdi:
- 2020: 1 nafar (Qashqadaryo viloyati)
- 2021: 3 nafar (Jizzaxdan 2 nafar va Toshkent viloyati)
- 2023: 3 nafar (Qashqadaryodan 2 nafar va Samarqand viloyati)
- 2024: 1 nafar (Toshkent viloyati).
Izoh (0)