Xitoy o‘z Qurolli kuchlari haqidagi ma’lumotlarni internetda e’lon qilishni cheklovchi yangi qoidalarni joriy etdi. Bu qadam dunyodagi eng yirik armiya faoliyatini kuzatishni cheklashi mumkin.
Ushbu qoidalar 1-martdan boshlab kuchga kiradi. U Xitoy armiyasini AQSH harbiy qudratiga tenglashish uchun tezlik bilan kengaytirish va modernizatsiya qilayotgani haqidagi ma’lumotlar fonida e’lon qilindi.
Kiritilgan cheklovlar Xitoy harbiy blogerlari va sharhlovchilariga katta ta’sir ko‘rsatishi mumkin. Ular yangi qurol-yarog‘ tizimlari, kadrlar tayinlovi va qo‘shinlar harakati haqidagi rasmlar yoki ma’lumotlarni ulashishga odatlangan.
Xitoy hukumatiga ko‘ra, bu geosiyosiy keskinlik va xorijiy razvedka tuzilmalari faolligi kuchaygan sharoitda milliy xavfsizlikni mustahkamlash va davlat sirlarini himoya qilishga qaratilgan.
Taqiqlangan mavzular ro‘yxati qurol-yarog‘ tizimlarini ishlab chiqish va sinovdan o‘tkazishdan tortib, harbiy mashg‘ulotlar, harbiy qismlarning tashkiliy tuzilmalari, vazifalari va jangovar imkoniyatlarini o‘z ichiga oladi.
Yangi qoidalar Xitoy harbiylarining faoliyati haqida xorijiy OAVdagi chiqishlarga qanday ta’sir ko‘rsatishi hozircha noma’lum.
Harbiy va mudofaa mavzulariga oid kontent xitoylik internet foydalanuvchilari orasida katta qiziqish uyg‘otadi, ammo rahbariyat maxfiy ma’lumotlar va taxminlar mamlakatning harbiy rivojlanishi va imkoniyatlari haqidagi rasmiy ritorikaga zarar yetkazmasligini ta’minlashga intilmoqda, dedi China Media Project ijrochi direktori Devid Bandurski.
FT: Xitoy Pentagondan 10 baravar katta qo‘mondonlik markazi qurmoqda
31-yanvar kuni Pekin g‘arbida AQSH Mudofaa vazirligi (Pentagon) shtab-kvartirasidan 10 baravar katta qo‘mondonlik markazi qurilayotgani haqida xabar tarqaldi. Financial Times nashri mazkur ma’lumotni sun’iy yo‘ldosh tasvirlari va razvedka manbalariga tayanib berdi.
Sun’iy yo‘ldosh tasvirlarida Pekindan 30 km janubi-g‘arbda joylashgan 6 kv/km dan ortiq qurilish maydoni ko‘rsatilgan. Asosiy qurilish ishlari 2024-yil o‘rtalarida boshlangan.
Qurilish maydonida Xitoy harbiy rahbarlarini urush payti himoya qilish uchun bunkerlar joylashtiriladigan chuqurliklar kuzatildi, degan harbiy ekspertlar.
Voqea joyida harbiylar ko‘rinmasa-da, dronlar yoki fotosuratga olishdan ogohlantiruvchi belgilar bo’lgan. Darvoza oldidagi qo‘riqchilar birdaniga kirish taqiqlanganini aytgan va loyiha haqida gapirishdan bosh tortgan. Qurilish maydonchasidan chiqib ketayotgan rahbarlardan biri esa bunga izoh bermagan.
Izoh (0)