Ukraina futbol assotsiatsiyasi (UAF) prezidenti Andrey Shevchenko Anatoliy Timoshukning Lozannadagi UAF’ga qarshi sudda yutib chiqqaniga izoh berdi.
– Anatoliy Timoshuk CAS sudida apellyatsiyani yutdi. Bu borada keyingi qadamlaringiz qanday bo‘ladi? Chunki, mening tushunishimcha, oldin qo‘yilgan sanksiyalar bekor qilinishi kerak.
– Ukraina futbolida Timoshukka o‘rin yo‘q va bo‘lmaydi ham. Bu butun jamiyat, men va hammamizning qat’iy pozitsiyamiz. U CAS sudida apellyatsiyani yutganini biz hal qilganimiz yo‘q.
Men shuni ayta olamanki, biz uchun u ukrain futbolida mavjud emas va bu men uchun mutlaq aniq masala. Shuning uchun men bu mavzuni ko‘tarishning umuman hojati yo‘q deb hisoblayman, dedi Shevchenko.
Eslatib o‘tamiz, Lozannadagi Sport arbitraj sudi (CAS) sobiq futbolchi Anatoliy Timoshukning UAF intizom qo‘mitasi qaroriga qarshi bergan apellyatsiyasini qanoatlantirdi.
45 yoshli “Zenit” murabbiyi Ukraina — Rossiya mojarosi bo‘layotgan pallada rus klubida ishlashni davom ettirgani sababli unga qo‘yilgan sanksiyalarni bekor qilishni talab qilgan edi.
2022-yil mart oyida UAF uni barcha unvonlaridan mahrum qilgan, murabbiylik litsenziyasidan ayirgan va umrbod milliy jamoalar rasmiy reyestridan chiqarib tashlagandi.
Izoh (0)