Toshkent viloyatining Toshkent shahriga tutash hududlaridagi issiqxonalar faoliyati 11-fevral kuni tungi vaqtda o‘rganildi. Bu haqda Ekologiya vazirligi matbuot xizmati xabar berdi.
Bunda 70 nafar xodimdan iborat 6 ta ishchi guruh tuzilib, Zangiota, Qibray va Toshkent tumanlaridagi 40 dan ortiq issiqxona faoliyati ko‘zdan kechirildi. O‘rganish davomida ayrim issiqxonalar atmosferaga meʼyoridan ortiq zararli moddalar chiqarayotganligi, filtr o‘rnatilmaganligi va boshqa huquqbuzarlik holatlari aniqlandi.
Natijada 26 ta issiqxonaga ogohlantirish berildi va 2 ta issiqxona egasiga belgilangan talablarni bajarmaganligi yuzasidan maʼmuriy jarima jazosi qo‘llanildi.
Joriy kuz-qish mavsumida jami 630 ta issiqxonada o‘rganish tadbirlari olib borildi. Issiqxonalarning 396 tasi faoliyat yuritayotganligi va 234 tasi (Zangiota tumanida 77 ta, Qibray tumanida 12 ta, Toshkent tumanida 24 ta, Yunusobod tumanida 108 ta, M.Ulug‘bek tumanida 1 ta, Yashnabod tumanida 9 ta, Bektemir tumanida 3 ta) mavsumiy bo‘lganligi, yaʼni qozonxonasi yo‘qligi sababli ish faoliyatida emasligi aniqlandi.
Issiqxonada dudburondan foydalanish qoidalarini buzgan jami 58 ta issiqxona egalariga maʼmuriy jarimalar qo‘llanildi. Yana 103 tasining faoliyati to‘xtatildi.
Avvalroq Toshkent viloyatida isitishda rezina shinalardan foydalangan 8 ta issiqxona jarimaga tortilgan edi.
Gaz o‘g‘irlayotgan issiqxonalar
Izoh (0)