O‘zbekistonda fuqarolar yig‘ini raislarining vakolat muddati 5 yilga uzaytirildi. 11-fevral kuni imzolangan qonun bilan ayrim qonun hujjatlariga bu haqda tegishli o‘zgartirish va qo‘shimchalar kiritildi.
Qonunga ko‘ra, “Fuqarolarning o‘zini o‘zi boshqarish organlari to‘g‘risida”gi va “Fuqarolar yig‘ini raisi saylovi to‘g‘risida”gi qonunlariga fuqarolar yig‘ini raisi vakolatlari muddati 3 yildan 5 yilga uzaytirilishini, bo‘shab qolgan o‘rinlarga fuqarolar yig‘inlari raislarining 5 yil muddatga saylanishini nazarda tutuvchi o‘zgartirish va qo‘shimchalar kiritilmoqda.
Shuningdek, fuqarolar yig‘inlari raislari saylovini tashkil etish va o‘tkazishga ko‘maklashuvchi Qoraqalpog‘iston Respublikasi, viloyatlar va Toshkent shahar komissiyalarining vakolatlari aniqlashtirildi.
Qonun rasmiy e’lon qilingan kundan e’tiboran kuchga kiradi. Qonun amalga kiritilguniga qadar saylangan fuqarolar yig‘inlari raislari o‘z vakolatlarini ular saylangan 3 yillik muddat tugaguniga qadar amalga oshiradi.
Mahalla raislari vakolat muddati uzaytirilishi
2023-yil 21-dekabr kuni prezidentning “O‘zbekiston mahallalari uyushmasi faoliyatini yo‘lga qo‘yish va mahallalarda boshqaruv tizimini takomillashtirishga oid qo‘shimcha chora-tadbirlar to‘g‘risida”gi qarori qabul qilingandi. Qarorda “Fuqarolarning o‘zini o‘zi boshqarish organlari to‘g‘risida”gi qonun yangi tahrirda ishlab chiqilishi, unda mahalla raisining vakolat muddatini 3 yildan 5 yil muddatga uzaytirish va boshqalar nazarda tutilishi belgilangandi.
Oliy Majlis Qonunchilik palatasining 14-yanvar kuni bo‘lib o‘tgan majlisida fuqarolar yig‘ini raislari — mahalla raislarining vakolat muddatini uzaytirish to‘g‘risidagi qonun loyihasi uchinchi o‘qishda qabul qilingandi. Majlisda deputat Abdulla Aslanov mahalla raislarining navbatdagi saylovi 2025-yilning may oyida o‘tkazilishi belgilanib, ushbu saylovni tashkil etish bilan bog‘liq xarajatlar davlat byudjeti smetasiga kiritilganini aytdi.
Fuqarolar yig‘ini raisi vakolatlari muddati 3 yildan 5 yilga uzaytirish, bo‘shab qolgan o‘rinlarga fuqarolar yig‘inlari raislarini 5 yil muddatga saylash, shuningdek fuqarolar yig‘inlari raislari saylovini tashkil etish va o‘tkazishni Qoraqalpog‘iston Respublikasi, viloyatlar va Toshkent shahar komissiyalarining vakolatlariga o‘tkazish nazarda tutilgan qonun Senat tomonidan 25-yanvar kuni ma’qullangandi.
Izoh (0)