Ukraina Tashqi ishlar vazirligining sobiq rahbari Dmitriy Kuleba mamlakat armiyasining Rossiya qo‘shinlari oldinga siljishini to‘xtata olmasligini ma’lum qildi.
Kuleba Germaniyaning Deutsche Welle nashriga bergan intervyusida Ukraina armiyasi salohiyati faqat Rossiya armiyasini sekinlashtirishga yetishini ta’kidladi.
Biz realist bo‘lishimiz lozim. Pessimist emas, buni alohida ta’kidlayman, umidsizlikka tushish shart emas. Hozirgi vaziyat shundan iboratki, bizda ruslarning oldinga siljishini to‘xtatish yoki ularni Ukraina hududidan siqib chiqarishni boshlash uchun yetarli imkoniyat yo‘q. Ayni paytda imkoniyatlarimiz faqat Rossiya armiyasining harakatini iloji boricha sekinlashtirishga yetadi, dedi sobiq vazir.
Uning so‘zlariga ko‘ra, Ukraina G‘arbdan qurol-yarog‘ yetkazib berishning ko‘payishiga ham umid bog‘lamasligi kerak. Shuningdek, Kuleba Ukraina armiyasining o‘z ishlab chiqarish quvvatlari Rossiyanikilarga nisbatan unchalik ishonchli emasligini qayd etdi.
11-fevral kuni bo‘lib o‘tgan matbuot anjumanida Pentagon rahbari Pit Xegset Ukrainaga yangi qurol-yarog‘ yetkazib berish masalasi mamlakat mudofaasi bo‘yicha aloqa guruhining 26-yig‘ilishida muhokama qilinmasligini ma’lum qildi.
“Ukraina qanday real xavfsizlik kafolatlariga umid qilishi mumkin? Kiyev yadro quroliga ega bo‘ladimi?” degan savolga sobiq vazir quyidagicha javob berdi:
Men bu mavzu ommalashganini tushunaman, lekin odamlarni aldashni istamayman. Ukraina yadro quroliga ega bo‘lmaydi, Ukraina yadro qurolini ishlab chiqarmaydi ham. Bu haqda odamlarda jo‘shqin his-tuyg‘ularni uyg‘otish uchun gapirish mumkindir, ammo biz voqelikka ko‘z yummasligimiz kerak.
Kuleba, shuningdek, agar NATOga qo‘shilishdan bosh tortish Moskvaning qat’iy talabi bo‘lsa, Ukraina odessacha ish tutish kerakligini aytdi:
Bu yerda bir nechta omillar bor. Birinchisi: Ukrainaning NATOga a’zoligi masalasi Ukrainaning qo‘lida ham, NATOning qo‘lida ham emas. Vashington va Berlinning pozitsiyalari Ukrainaning alyansga kirishi yoki kirmasligini hal qiluvchi ahamiyatga ega.
Izoh (0)