Toshkent va Nukus shaharlari hamda viloyat markazlarida ekologik xavfli korxonalarni ishga tushirish to‘xtatiladi. Bu prezidentning davlat dasturini 2025-yilda amalga oshirish to‘g‘risidagi farmonida belgilandi.
Hujjatga ko‘ra, keng jamoatchilik, xalqaro va mahalliy ekofaollar, O‘zbekiston ekologik partiyasi va Ekologiya, atrof-muhitni muhofaza qilish va iqlim o‘zgarishi vazirligi taklifini inobatga olgan holda 2025-yil 1-maydan boshlab Toshkent va Nukus shaharlari hamda viloyat markazlarida quyidagi yo‘nalishlarda yangi loyihalarni amalga oshirish taqiqlanadi:
- asbest, sement ishlab chiqarish, shlam va shlaklar;
- teri-ko‘nchilik, parrandachilik fabrikalari;
- samaradorligi yuqori bo‘lgan chang-gaz tozalash inshootlari bilan jihozlanmagan har qanday turdagi ko‘mir yoqish;
- qora va rangli metallurgiya zavodlari, tarkibida zaharli aralashmalar bo‘lgan oyna, zaharli kimyoviy moddalar bilan ishlash;
- xavflilik darajasining I va II sinfiga mansub chiqindilarni qayta ishlash va yoqish korxonalari.
Respublikaning barcha hududlarida joylashgan issiqlik va elektr energiyasi ishlab chiqarish korxonalariga yoqilg‘i sifatida mazutdan foydalanishni to‘liq taqiqlash ko‘zda tutilmoqda. Avariyaviy yoqilg‘i sifatida Ekologiya, atrof-muhitni muhofaza qilish va iqlim o‘zgarishi vazirligini xabardor qilib, Vazirlar Mahkamasi bilan kelishgan holda foydalanish holatlari bundan mustasno.
Shuningdek, Ekologiya, atrof-muhitni muhofaza qilish va iqlim o‘zgarishi vazirligi, Iqtisodiyot va moliya vazirligi, Energetika vazirligi, Investitsiyalar, sanoat va savdo vazirligi hamda mahalliy hokimliklar bilan birgalikda 2025-yil 1-oktyabrga qadar atrof muhitga ta’siri yuqori bo‘lgan obyektlarni va energiya sarfi yuqori bo‘lgan yo‘nalishlardagi mavjud quvvatlarni modernizatsiya qilgan holda Toshkent va Nukus shaharlari hamda viloyat markazlaridan bosqichma-bosqich ko‘chirish bo‘yicha asoslantirilgan takliflarni Vazirlar Mahkamasiga kiritishi lozim.
2024-yilning mart oyida bo‘lib o‘tgan yig‘ilishda Shavkat Mirziyoyev poytaxtdagi sanoat korxonalarini bosqichma-bosqich shahardan tashqariga ko‘chirish rejalashtirilgani, bu Toshkent viloyati uchun katta imkoniyat ekani ta’kidlagandi.
Ekologiya, atrof-muhitni muhofaza qilish va iqlim o‘zgarishi vazirligining bildirishicha, Toshkent, Nukus shaharlari va viloyatlar markazlarida atrof-muhitga yuqori darajada ta’sir ko‘rsatadigan yangi loyihalarni amalga oshirishning taqiqlanishi, shuningdek, mavjud 168 ta sanoat korxonasining bosqichma-bosqich ko‘chirilishi hududlarning ekologik barqarorligini ta’minlaydi.
Izoh (0)