O‘zbekistonda Bosh prokuraturaga kichik quvvatli qayta tiklanuvchi energiya manbalari qurilmalarini o‘rnatish rejasining ijrosini ta’minlash, shuningdek, quyosh panellari va geliokollektorlar o‘rnatilishida qonunchilik talablariga so‘zsiz rioya etilishi ustidan qat’iy nazoratni amalga oshirib borsish topshirildi.
Prezident farmoni bilan imzolangan “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturida, shuningdek, respublika energobalansida qayta tiklanuvchi energiya ulushini oshirish, shu jumladan, davlat-xususiy sheriklik asosida yirik “yashil energiya” stansiyalarini barpo etish, hududlarda kichik va mikrogeslar tarmog‘ini kengaytirish, aholi xonadonlarida quyosh panellarini o‘rnatishni rag‘batlantirish belgilangan.
2025-yilda umumiy quvvati 4,5 GVt bo‘lgan yirik quyosh va shamol elektr stansiyasini ishga tushirish, quvvati 785 megavatt bo‘lgan quyosh panellarini o‘rnatish, quvvati 225 megavatt bo‘lgan gidroelektr stansiyalarini barpo etish orqali jami qayta tiklanuvi energiya manbalari ulushini elektr energiyasi ishlab chiqarishda 26 foizga va jami generatsiya quvvatlari tarkibidagi ulushini 40 foizga yetkazish rejalashtirilmoqda.
Energetika vazirligi Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari bilan birgalikda bir oy muddatda 2025-yilda quyosh panellari va geliokollektorlarni tuman va shaharlar kesimida o‘rnatish dasturini, 2025—2026-yillarda respublika hududlarida mikrogidroelektr stansiyalarini qurish dasturini Vazirlar Mahkamasiga kiritishi lozim.
O‘zbekistonda yashil energiya ulushi 40 foizga yetkazilishi haqida energetika vaziri Jo‘rabek Mirzamahmudov 2023-yilning noyabrida aytgandi. Vazir “O‘zbekiston 24” telekanaliga bergan intervyusida 2030-yilga borib 120 milliard kVt/soat elektr energiya ishlab chiqarishni rejalashtirilayotganini, shuning 40 foizini qayta tiklanuvchi energiya manbalari tashkil etishini aytgandi.
Shavkat Mirziyoyev 2025-yil 27-yanvar kuni o‘tkazgan yig‘ilishda davlat korxonalari, sanoat va xizmat ko‘rsatish majmualari hamda xonadonlarda quyosh panellari o‘rnatishni rag‘batlantirish davom ettirilishi, bunga 2 trillion so‘m kredit ajratilishi ma’lum qilingandi.
Bosh prokuratura ushbu yig‘ilishda mas’ullarga 100 mingta obyektda, 150 mingta xonadonda jami 600 MVt quvvatda quyosh paneli o‘rnatilishi bo‘yicha berilgan topshiriq ijrosini ta’minlash maqsadida joylarda mahalliy hokimliklar, bojxona, O‘zenergoinspeksiya, tijorat banklari, ta’minot korxonalari va boshqa tegishli idoralardan iborat ishchi guruh tuzish bo‘yicha ko‘rsatma berilganini e’lon qilgandi.
Davlat rahbari BAAda bo‘lib o‘tgan “Abu Dabi barqaror rivojlanish haftaligi” sammitida so‘zlagan nutqida O‘zbekistoning tez sur’atlarda o‘sib borayotgan iqtisodiyotining energetikaga bo‘lgan talabini to‘liq qondirish uchun “yashil” quvvatlar jadal rivojlantirilayotganini ma’lum qilgandi.
O‘tgan 5 yilda energetika sohasiga qariyb 20 milliard dollar xorijiy investitsiyalar jalb qilindi va 9,6 gigavatt zamonaviy energiya quvvatlari ishga tushirildi. Jumladan, 3,5 gigavattli 14 ta quyosh, shamol elektr stansiyalari va 300 megavattli 2 ta saqlash tizimlari ishga tushirildi. “Yashil” energiya sohasida BAA O‘zbekistonning ishonchli va strategik hamkoridir. So‘nggi yillarda Amirliklar bilan investitsiyalar portfeli 26 milliard dollardan oshdi.
Izoh (0)