Isroil harbiylari Iordan daryosining bosib olingan G‘arbiy qirg‘og‘ining turli hududlarida falastinlik mahbuslar oilalarining uylariga bostirib kirdi, deb xabar bermoqda Anadolu.
Aniqlanishicha, ushbu mahbuslarning ko‘pchiligi o‘t ochishni to‘xtatish kelishuvi doirasida ozod qilinishi kutilmoqda. Guvohlarning xabar berishicha, isroillik harbiylar mahbuslarning qarindoshlaridan ularning qamoqxonalardan ozod etilishini nishonlamaslikni talab qilgan.
Xususan, Isroil armiyasi HAMAS yetakchilaridan biri va mahbus Jamol al-Tavilning G‘arbiy Iordan sohilining markaziy qismida joylashgan Al-Bira shahridagi uyiga bostirib kirib, uning oilasiga hech qanday tantana o‘tkazmaslikni buyurgan.
Mahbusning qizi, jurnalist Bushra et-Tavilga kora, isroillik askarlar otasining ozod etilishi nishonlansa, barcha oila a’zolarini qamoqqa olish bilan tahdid solgan.
Guvohlardan olingan ma’lumotlarga ko‘ra, Isroil armiyasi yana bir mahbusning yaqinlari yashaydigan Ramallaning shimolida joylashgan Kubar qishlog‘idagi uyiga ham bostirib kirgan. Isroil askarlari erkakning oilasiga hech qanday tantana uyushtirmaslik haqida ogohlantirish bergan.
8-fevral kuni Isroil armiyasi uch nafar isroillik asirning ozod etilishiga javoban 183 nafar falastinlik mahbusni qamoqdan chiqaradi. Ulardan 18 nafari umrbod, 54 nafari esa uzoq muddatli qamoq jazosiga hukm qilingan. Yana 111 nafari 2023-yil 7-oktyabrda Isroil hujumlari boshlanganidan keyin G‘azo sektorida qo‘lga olingan falastinliklardir.
Isroil va HAMAS o‘rtasida o‘t ochishni to‘xtatish kelishuvi va asirlar almashinuvi
HAMAS va Isroil o‘rtasida o‘t ochishni to‘xtatish va asirlarni almashish bo‘yicha kelishuv 19-yanvar kuni kuchga kirdi.
Asirlar almashinuvining dastlabki to‘rt bosqichida Isroil qamoqxonalaridan 583 nafar falastinlik mahbus, shuningdek, G‘azo sektoridagi 13 nafar isroillik va 5 nafar taylik mahbus ozod qilindi.
Umuman olganda, o‘t ochishni to‘xtatish to‘g‘risidagi kelishuvni amalga oshirish uch bosqichda o‘tkaziladi. 42 kun davom etadigan kelishuvning birinchi bosqichi doirasida 1900 dan ortiq falastinlik va 33 nafar isroillik ozod qilinishi kutilmoqda.
Izoh (0)