O‘zbekistonda 2025-yilning yanvar oyi nisbatan iliq keldi. Bu haqda O‘zgidromet xabar berdi.
Maʼlum qilinishicha, yanvarda o‘rtacha oylik havo harorati iqlim meʼyoridan 0,5-1 darajaga, shimolda 2-3 darajaga, Ustyurtda 4 darajaga yuqori bo‘ldi. Yanvar oyining birinchi va uchinchi o‘n kunliklarida respublika hududi bo‘yicha sovuq to‘lqinlar kuzatildi, bunda harorat meʼyordan 2-3 darajaga, 23-24-yanvar kunlarida esa 4-5 darajaga past bo‘lishi qayd etildi.
Yanvar oyining ikkinchi o‘n kunligi iliq bo‘ldi, hududning katta qismida meʼyordan 1-3 darajaga yuqori bo‘lishi qayd etildi.
Eng sovuq kechalarda havo harorati 3-8 daraja sovuqqacha, shimolda 9-14 daraja sovuqqacha pasaydi. Hududning katta qismida eng iliq kunlarda havo 11-16 daraja iliqqacha, janubda baʼzi joylarda 17-19 daraja iliqqacha isidi.
2025-yili yanvar oyi qish mavsumining eng sovuq oyi sifatida o‘z nomini oqlay olmadi. 2024-yil dekabr oyining o‘rtacha oylik harorati 2025-yil yanvar oyiga nisbatan 1-2 daraja past bo‘lib, dekabrdagi sovuqlar esa yanvar oyi sovuqlariga nisbatan kuchliroq bo‘lgan. 2025-yil yanvar oyi 2023-yil yanvar oyidagi kabi sovuq (ushbu asrdagi ikkinchi eng sovuq yanvar oyi, 2008-yildan keyin) va 2024-yil yanvar oyidagi kabi iliq bo‘lmadi, bu meteorologik kuzatuvlar tarixidagi eng iliq yanvar oylari uchligiga kirdi.
Yanvar oyi juda quruq keldi. Respublika hududining katta qismida oy davomida yog‘ingarchilik meʼyordan 50 foizdan kam bo‘ldi. Xorazm viloyati, Qoraqalpog‘iston Respublikasining janubi, Farg‘ona vodiysi va Buxoro, Navoiy viloyatlari hududlarining katta qismi eng qurg‘oqchil hududlar bo‘lib, ularda oylik yog‘ingarchilik miqdori meʼyordan 20 foizdan kam bo‘ldi.
Faqat Surxondaryo viloyatida va Qoraqalpog‘iston Respublikasining shimoliy hududlarida baʼzi joylarda yog‘ingarchilik meʼyor atrofida va undan ko‘p bo‘ldi.
Tekislik hududlarda yog‘ingarchilik asosan yomg‘ir ko‘rinishida yog‘di. Ayrim kunlarda baʼzi joylarda yomg‘ir qorga aylanishi kuzatildi, ammo hududning katta qismida qor qoplami hosil bo‘lmadi. Qisqa muddatga (1-2 kun) balandligi 0,5 sm dan 3 sm gacha bo‘lgan qor qoplami faqat respublikaning markaziy va janubi-sharqiy hududlarining baʼzi joylarida kuzatildi.
O‘zbekistonning tog‘li hududlarida oy davomida qor qoplamining ko‘payishi qayd etildi, biroq tog‘li hududlarning katta qismida qor o‘rtacha ko‘p yillik va o‘tgan yilgi qiymatlardan kam bo‘ldi.
Oy oxirida tog‘larda qor zaxiralari meʼyordan 50-70 foizni, Qamchiq dovoni hududida 40 foizni tashkil etdi. Faqat Toshkent viloyati Bo‘stonliq tumanining o‘rta tog‘ hududlarida (Chimyon meteostansiyasi maʼlumotlari bo‘yicha) qor balandligi o‘rtacha ko‘p yillik qiymatlarga yaqin bo‘ldi.
Yanvar oyida tez-tez tuman hodisalari kuzatildi, ko‘rinuvchanlik esa 50-500 m gacha yomonlashdi.
Izoh (0)