Andijon viloyatida voyaga yetmagan qizga nisbatan uyatsiz-buzuq harakatlar qilgan shaxs ma’muriy javobgarlikka tortilganligi haqida xabar berilgan edi. Bosh prokuratura tomonidan sud qarorlari qonuniyligi o‘rganildi.
O‘rganish natijasiga ko‘ra, Bosh prokuratura tomonidan Oliy sud jinoyat ishlari bo‘yicha sudlov hay’atiga jinoyat ishlari bo‘yicha Asaka tuman sudining 2024-yil 10-dekabrdagi va Andijon viloyat sudi apellyatsiya instansiyasining 2024-yil 23-dekabrdagi qarorlariga nisbatan taftish tartibida protest keltirildi.
Nemolchi.uz’ning yozishicha, holat 2024-yil noyabrida yuz bergan. 1987-yilda tug‘ilgan erkak ayoli bilan bo‘lgan intim ehtiyojlarini qondira olmagan va unga qo‘shnisi M.ni (2011-yilda tug‘ilgan) olib kelishini aytgan. Biroq, erkakning so‘zlariga ko‘ra, u uxlab qolgani uchun keyin nima bo‘lganini eslay olmaydi. Uning rafiqasi esa apellyatsiya sudida adashib, eri aytgan R. o‘rniga uning voyaga yetmagan singlisi — 13 yoshli M. ni olib kelganini aytgan.
Voyaga yetmagan qizning so‘zlariga ko‘ra, qo‘shni ayol uni eri bilan jinsiy aloqa qilishi uchun uyiga olib kelgan. Ayol buning evaziga 50 ming so‘m taklif qilgan va qiz “hech narsani ko‘rmasligi va og‘riqni his qilmasligi” uchun ko‘zini bog‘lab qo‘yishini ham aytgan. Qiz buni rad etgach suhbatga ayolning eri ham aralashgan va u rozi bo‘lsa 100 ming so‘m berishini aytgan. Qiz qo‘rqib, qochib ketgan.
Bosh prokuratura matbuot xizmati bergan ma’lumotga ko‘ra, qizning onasi qo‘shni er-xotinlar uyatsiz-buzuq harakatlar qilgani haqida ichki ishlar organiga murojaat qilgan. Olib borilgan tergovga qadar tekshiruv harakatlari natijasiga ko‘ra, fuqaro A.B. va uning turmush o‘rtog‘i Yu.T.ni ma’muriy javobgarlikka tortish to‘g‘risida qaror qabul qilinib, to‘plangan hujjatlar mazmunan ko‘rish uchun sudga yuborilgan.
Sudning tegishli qarori bilan erkak 5 sutka ma’muriy qamoq jazosi, uning ayoliga esa BHMning ikki barobari (750 ming so‘m) miqdorida jarima jazosi tayinlangan.
Mazkur sud qaroridan norozi bo‘lib berilgan apellyatsiya shikoyati qanoatlantirilmagan.
Izoh (0)