35 yoshli aktrisa Lili Kollinz va uning 41 yoshli turmush o‘rtog‘i, rejissyor Charli Makdauell ilk marta ota-ona bo‘lishdi. Kollinz bu yangilikni o‘zining Instagram sahifasida e’lon qildi va farzandining surati bilan bo‘lishdi.
Er-xotin surrogat ona yordami bilan qizlik bo'lishdi. Chaqaloqqa Tuve Jeyn deb ism qo‘yildi.
“Hayotimizning markaziga xush kelibsiz, Tuve Jeyn Makdauell. Bizning ajoyib surrogat onamizga va bu yo‘lda bizga yordam bergan barchaga cheksiz minnatdorchiligimizni ta’riflashga so‘z ojiz”, deb izoh qoldirdi aktrisa.
“Biz seni cheksiz yaxshi ko‘ramiz”, deb yozdi Kollinz qiziga qarata.
Ma’lumot uchun, Lili Kollinz 1989-yil 18-martda Angliyaning Gildford shahrida tug‘ilgan. U aktrisa, model va yozuvchi hamdir. Lilining otasi mashhur britaniyalik musiqachi Fil Kollinz, onasi esa Jill Tavelman. Bo‘lajak aktrisa bolaligida AQShga ko‘chib o‘tgan va Los Anjelesda voyaga yetgan.
Uning kino karyerasi 2009-yilda boshlangan bo‘lib, tez orada mashhur filmlarda rol o‘ynay boshlagan, eng katta mashhurlik unga Netflixning “Emili Parijda” loyihasi olib keldi. Lili Kollinz aktrisalikdan tashqari yozuvchilik bilan ham shug‘ullanadi. U Unfiltered: No Shame, No Regrets, Just Me nomli avtobiografik kitobini yozgan. 2021-yil 4-sentyabrda rejissyor Charli Makdauell bilan turmush qurgan.
Izoh (0)