Ijtimoiy tarmoqlarda xonanda Dildora Niyozovaning 2-fevral kuni Jizzax shahrida o‘tkazilishi kerak bo‘lgan konsert dasturi qoldirilgani, tomoshabinlar bir necha soat uni kutishgani haqidagi xabarlar paydo bo‘ldi. Bundan tashqari, to‘yxonada uni Milliy gvardiya xodimlari qo‘riqlayotgani bilan bog‘liq videolar ham ko‘plab muhokamalarga saabab bo‘ldi. “Daryo” muxbiri xonandaning prodyuseri va turmush o‘rtog‘i Latif Yusupov bilan bog‘landi.
— Bu konsert aslida 22-dekabrda bo‘lishi kerak edi. Bu tashkilotchilar bilan 4-5 yildan buyon ishlaymiz. Ishonchli odamlar deb bilardik. Shuning uchun ham konsertoldi ulardan “zaklad” pullarini so‘raganimiz yo‘q. Xullas, maʼmurlarimiz bir kun oldin tashkilotchilar bilan bog‘lanib “Pul tayyormi? Muammo bo‘lmaydimi?” deb so‘rashganida “Hammasi tayyor, bemalol kelaveringlar”, deyishgan. Avvalo, muxlislar uchun boriladi, to‘g‘ri, ammo safarga jamoa uchun oz-muncha mablag‘ sarflanmaydi.
Xullas, to‘yxonaga yetib borganimizda tashkilotchilar uzr so‘rab, pul yo‘qligini aytishdi. Buni qanday tushunish mumkin, deb biroz jahlimiz chiqdi. Bu yerda boshqa gap bor edi, keyin bilsak, tashkilotchilarning sherigi pulni olib qochib ketgan ekan. Dildora “Mayli, birinchi seansni xayriya qilib o‘tkazaylik, muxlislar ranjishmasin”, dedi. Konsertni o‘tkazganimizdan keyin, tashkilotchilar “17:00 dagi konsertni qoldiramiz, biz shu yerda turib, kelganlarga chipta pulini tarqatamiz”, deyishdi. U yerda tashkilotchilardan tashqari, to‘yxona egasi va Milliy gvardiya xodimlari ham bor edi. Kechki seansdagi konsertning asosiy chiptalarini qaysidir tashkilot sotib olgan ekan. Rahbari bilan gaplashib, vaziyatni tushuntirdik. “Shunday bo‘lishini bilgandik”, deyishdi.
“Ayrim muxlislar 7-8 soat kutdik”, deb yozishayotgan ekan. Ammo u yerda shuncha vaqt kutiladigan vaziyat bo‘lgani yo‘q. Tomoshabinlarning raqami bo‘lganida qo‘ng‘iroq qilib chiqardik. Odamlar to‘g‘ri tushunishsin, bizni ham aldashdi. Avvaliga hisobga umuman pul tushmagan, deyishdi. Undan keyin pulni olib qochib ketgan, deyishdi. Chipta pullari yeb yuborilgan, degan variant ham bor, deydi Dildora Niyozovaning turmush o‘rtog‘i Latif Yusupov.
Latif Yusupov Dildora Niyozovaning restoranda Milliy gvardiya xodimlari hamrohligida harakatlanayotgani aks etgan videoga ham o‘z munosabatini bildirdi.
— Xodimlarni biz yollaganimiz yo‘q. Ommaviy tadbirlarni o‘tkazayotganda tartibni saqlash uchun qo‘riqchilar yollanishi shart etib belgilangan. Ularni tashkilotchilar yollashgan. Ammo konsert nol darajada tashkillashtirilgan. Odam juda ham ko‘p edi, tartibga umuman eʼtibor berishgani yo‘q. Konsert to‘yxonada o‘tgani uchun ko‘pchilik videoni noto‘g‘ri tushunayotgan ekan. Yana bir jihat, tashkilotchilar “pul tushmadi”, deyishdi. Ammo katta to‘yxonada birorta bo‘sh o‘rindiq ko‘rganimiz yo‘q. Odamlar ham chiptani naqd pulga sotib olishganini aytishmoqda, deydi xonandaning turmush o‘rtog‘i.
Dildora Niyozova ham Instagram’dagi sahifasi orqali aloqaga chiqib, muxlislarining savollariga javob berdi.
— Hayotda ba’zan insonni o‘ylantirib qo‘yadigan vaziyatlar bo‘lar ekan. Bundan nolish ham noto‘g‘ri aslida. Boshga tushganni ko‘z ko‘radi. Inson yaxshi bir niyat qiladi, ammo siz o‘ylamagan narsalar bo‘ladi ba’zan. Hozir Jizzaxdan kelib, internetga kirsam men haqimda har xil gap-so‘zlar bo‘layotgan ekan. Iltimos, meni qarg‘amang, bilib-bilmay, masalaning tagiga yetmay, meni qarg‘amang. Menga birovning ortiqcha puli, haqqi kerak emas. Yaratganning bergani menga yetadi. Qancha bo‘lsa ham, bu men uchun xayrli. Halolidan bersin, xaromidan Xudo saqlasin.
Mana hozir yo‘ldan kelib, joyimda tinchgina uxlolmadim. Menga nimaga kerak, xalqning pulini yemaganman-ku, deb yotsam ham bo‘lardi, lekin men ijodkor bo‘lganim uchun hamma gap menga kelib taqaladi. Men konsertni o‘tkazib keldim. Shuncha xalq yig‘ilganini ko‘rib, to‘g‘risi, yig‘lab yubordim. Shunchalik xalqqa sevimli san’atkor ekanligimdan xursandman. Konsertlarimning tashkiliy masalalari bilan turmush o‘rtog‘im shug‘ullanadilar. Ular gaplashganimizda hammasi yaxshi dedilar. Bu vaziyatda aybdor san’atkor bo‘lib tuyuladi, lekin san’atkorning ortida nechta odam turadi? Tashkilotchilarga, bunday ishlarni o‘ylab qilinglar, birovning haqqi teshib chiqadi, degan bo‘lardim.
Konsertning birinchi seansiga borganimdayoq hafsalam pir bo‘ldi, chunki turmush o‘rtog‘im kelib pul muammo bo‘layotganini aytdilar. Shu o‘rinda aytib ketay, men umuman konsert qo‘ygim kelmaydi. San’atda 20 yildan beri bo‘lsam, shuncha payt ichida konsertlardan charchaganman. Men qo‘rqib qo‘shiq aytaman. Sababi qilayotgan ishim to‘g‘rimikan, noto‘g‘rimikan, degan o‘y meni qiynaydi.
Xalqning yig‘ilganini ko‘rib, pulni olmagan bo‘lsam ham, kirib qo‘shib kuyladim. Menga tashkilotchi pulingizni bir haftada qilib beramiz, dedi. Men esa “Menga pulingiz kerak emas, hozir boricha birinchi seans uchun pulni olaman, lekin ikkinchi seansning pulini odamlarga qaytarib bering”, dedim. Birinchi seans uchun ham kelishilgan pulning yarmining yarmini ham berishmadi. O‘sha pulni olib, sozandalarimga berdim. Chunki ular oila boquvchisi, deydi xonanda.
Izoh (0)