Xonanda Hilola Hamidova “Milliy” telekanalining “Ayol qalbi” ko‘rsatuviga bergan intervyusida turmushidagi qiyinchiliklar hamda fe’-atvoridagi o‘ziga pand bergan jihatlar haqida gapirdi.
— Turmush qurganimizga 17 yil bo‘ldi. Turmushimiz davomida sinovlar, qiyinchiliklar bo‘ldi. Qiyinchilik deganda turmush o‘rtog‘im bilan bir-birimizni tushunmay qolgan damlarni nazarda tutyapman. Ana shunday sinovlardan o‘tib, endi bir-birimizni tushunib boshlaganimizda munosabatlarimizni ko‘z-ko‘z qilsam, ko‘z tegib qolmasin deb, ko‘p ham shaxsiy hayotim haqida gapirmayman. Yaqinda turmush o‘rtog‘im bilan bir restoranga borganimizni videosini Instagram’ga joylagandim, shundan keyin ular juda qattiq kasal bo‘lib qoldilar, ertalabgacha uxlamay chiqdilar. Ko‘pchilik meni turmushga chiqmagan, ajrashgan deb ham o‘ylar ekan. Shuning uchun, o‘ylashimcha, qiziqish kuchli bo‘lgan.
Xonanda, shuningdek, turmushdagi qiyinchiliklar unga nima o‘rgatgani haqida ham gapirib o‘tdi.
— Men o‘ta jiddiy edim. Agar kulib, tabassum qilib yursam, odamlar meni yengiltak deb o‘ylaydi, deb o‘ylardim. Chunki odamlarning shunaqa fikrlarini ko‘p eshitganman. Turmush qurganimdan so‘ng esa jiddiyligim o‘zimga pand bergan vaqtlar ham bo‘ldi. Ozgina tushunmovchilik bo‘lsa ham jiddiy olib, janjallashib ketardim. Vaholanki, shunaqa vaziyatlarni ayol kishi biroz kulib yengib o‘tishi kerak ekan. Ayam “O‘zingni ozgina dovdirlikka solgin, hamma narsani yuragingga yaqin olaverma”, deydilar, o‘zi hayotda sal dovdirroq bo‘lish kerak ekan, deydi xonanda.
Hilola Hamidovaning aytishicha, turmushga chiqqanidan so‘ng jiddiyligidan voz kechishiga to‘g‘ri kelgan.
— San’atkor bo‘lib, elga tanila boshlaganimda menga eng ko‘p pand bergan narsa — uyatchanligim bo‘lgan. Chunki men uy qizi bo‘lganman. Hozir ham san’atni yig‘ishtirish fikri kelyapti xayolimga. Shunda turmush o‘rtog‘im “Zerikib qolmaysizmi?”, deydi. Men esa “Yo‘q, mazza qilib uyda o‘tiraman”, deyman. Hozir ham o‘zim bilan o‘zim kurash jarayonidaman. Hech qachon “san’atdan erta ketaman” degan qarorga kelaman, deb o‘ylamagandim. Lekin bu fikr o‘tgan yili, ayniqsa, bu yil juda kuchaydi, deydi xonanda.
Xonanda hayotida yuz bergan shukr qilishga undovchi voqea haqida ham so‘zlab berdi.
— Yaqinda turmush o‘rtog‘im bilan birgalikda Toshkentdan o‘zimiz ancha vaqtdan beri xarid qilishni orzu qilayotgan joyimizdan hovli sotib oldik. Hovlining egasi bilan narxini kelishib bo‘lganmiz, lekin qo‘limizda hech qancha pul yo‘q. Shunda tanishlardan pul so‘radik, hech kimdan chiqmadi. Ilojsiz faqat Allohga yuzlandik va 2 oy ichida Alloh nasib qilib, o‘sha hovlini sotib olishga muvaffaq bo‘ldik. Shu voqea meni shukr qilishga undadi, deydi Hilola.
Izoh (0)