Ekvadorda toshbaqani urib yuborgan haydovchi 13 ming dollardan ortiq jarimaga tortildi. Bu haqda Primicias xabar berdi.
Voqea 10-dekabr kuni Santa Krus orolida sodir bo‘lgan. Toshbaqa transport vositasi bosib ketganidan keyin tirik qolmagan. Atrof-muhitni muhofaza qilish boshqarmasi haydovchi tomonidan noyob hayvonlarga nisbatan tegishli xavfsizlik choralari buzilganini aniqlagan. Milliy bog‘ direksiyasi haydovchiga 13 248 dollarga teng miqdorda jarima solgan.
Ekvadorda toshbaqalarni, ayniqsa, Galapagos orollarining gigant toshbaqalarini o‘ldirish qat’iyan taqiqlangan. Ushbu toshbaqalar xalqaro tabiatni muhofaza qilish shartnomalari bilan himoyalangan. Ularni o‘ldirish yoki jarohat yetkazish og‘ir jarimalar va qonuniy oqibatlarga olib kelishi mumkin.
Mamlakatda yo‘qolib ketish xavfi ostidagi hayvonlarni o‘ldirish 1933-yildan beri taqiqlangan. Toshbaqa go‘shti bir vaqtlar lazzatli taom hisoblangan, ammo endi ularni ovlaganlar 3 yilgacha qamoq jazosiga tortilishi mumkin.
2019-yilda toshbaqani bosib ketib, uning chig‘anog‘ini shikastlagan odam 11 ming dollar jarimaga tortilgandi. O‘sha yili yana bir haydovchi xuddi shunday huquqbuzarlik uchun 15 000 dollardan ortiq to‘lashga majbur bo‘lgan. Bundan tashqari, 2022-yilda Ekvador to‘rtta Galapagos gigant toshbaqasining o‘ldirilishi bo‘yicha tergov boshladi. Prokurorlar bu toshbaqalar ovlangani va iste’mol qilinganini taxmin qilgandi.
Izoh (0)