Rossiya prezidenti Vladimir Putin amaldorlar va davlat kompaniyalari xodimlari mahalliy avtomobillarga o‘tishi kerakligini ta’kidladi. Bu haqda “Kommersant” xabar berdi.
Putinning so‘zlariga ko‘ra, u ilgari ham shunday topshiriq bergan, ammo u hali to‘liq bajarilmagan.
“Amaldorlarni Rossiya avtomobillariga o‘tkazish zarur. Darhaqiqat, bunday topshiriq berilgan. Ammo, afsuski, bu sohadagi vaziyatni kuzatib, bu ko‘rsatma hali to‘liq bajarilmaganini ko‘ryapman”, dedi u AvtoVAZ zavodi xodimlari bilan suhbat chog‘ida.
Rossiya prezidenti muammo ishlab chiqarilgan avtomobilning mahalliylashtirish darajasini aniqlash qiyinligi bilan bog‘liqligini aytdi. U shu borada mezonlar ishlab chiqilayotgani va bu masala bilan shaxsan shug‘ullanayotganini bildirdi.
“Albatta, biz shu yo‘ldan borishda davom etamiz. Aytgancha, bu qo‘llab-quvvatlash shakllaridan biri bo‘ladi — ham samarali, ham mutlaqo bozor talablariga mos. Davlat o‘zining mahsulotini sotib olishi mutlaqo tabiiy holdir”, dedi u.
Davlat xizmatchilari uchun tavsiya etilgan avtomobillar qatoriga 2025-yil aprel oyida ishlab chiqarilishi rejalashtirilgan yangi Lada Iskra ham kiradi. Putin AvtoVAZ zavodiga tashrifi chog‘ida ushbu avtomobilni baholab, zavod xodimlarining mehnatini yuqori baholagan. Rossiya prezidenti 2023-yil sentyabr oyida rasmiylar tomonidan mahalliy avtomobillardan ustuvor foydalanish bo‘yicha rasmiy topshiriq bergandi.
Putinning tashabbusi 1997-yilda bosh vazir o‘rinbosari bo‘lgan Boris Nemtsov tomonidan ilgari surilgan g‘oyani takrorlaydi. 1997-yil 1-aprelda prezident Boris Yeltsinning hukumat amaldorlari uchun xorijiy avtomobillarni sotib olishni taqiqlovchi farmoni kuchga kirgandi.
Biroq tajriba muvaffaqiyatsiz tugagan, jumladan mahalliy avtomobillarni boshqarishga harakat qilgan amaldorlar nosozliklar haqida doimiy ravishda shikoyat qilardi. Ikki yil o‘tgach, bu vaqt davomida chet el mashinasini haydashda davom etgan Yeltsin o‘z buyrug‘ini bekor qilish to‘g‘risidagi farmonga imzo chekkan.
Izoh (0)