Shavkat Mirziyoyev 27-yanvar kuni Aleksandr Lukashenko bilan telefon orqali muloqot qilib, prezident saylovidagi ishonchli g‘alabasi bilan tabrikladi.
Prezident matbuot xizmatining xabar qilishicha, Shavkat Mirziyoyev saylovchilarning faol ishtiroki va ovoz berish natijalari Belarus xalqi amaldagi prezidentga yuksak ishonch bildirayotgani, amalga oshirilayotgan siyosat va ijtimoiy-iqtisodiy islohotlarni keng qo‘llab-quvvatlayotganini yana bir bor tasdiqlaganini alohida ta’kidladi.
Suhbat chog‘ida o‘tgan yil 7—9-fevral kunlari Aleksandr Lukashenkoning O‘zbekistonga tashrifi chog‘ida erishilgan kelishuvlarni amalga oshirish nuqtai nazaridan O‘zbekiston—Belarus ko‘p qirrali sheriklik munosabatlarini yanada rivojlantirishning dolzarb masalalari ko‘rib chiqildi.
2024-yilda tovar ayirboshlash hajmi 700 million dollardan oshdi. Iqtisodiyotning turli tarmoqlarida sanoat kooperatsiyasi loyihalarini jadallashtirish, yaqin ishbilarmonlik va hududlararo aloqalarni, faol madaniy-gumanitar almashinuvlarni davom ettirish muhimligi ta’kidlandi.
O‘zbekiston va Belarus yetakchilari bo‘lajak tadbirlar rejasini ham ko‘rib chiqdi.
Lukashenko prezidentlik saylovida yettinchi marta g‘alaba qozondi
Belarusda prezidentlik saylovi 26-yanvar kuni bo‘lib o‘tdi. Mamlakatning amaldagi rahbari Aleksandr Lukashenko yettinchi prezidentlik muddatiga qayta saylandi. Unga saylovchilarning 86,82 foizi ovoz berdi. Saylovchilarning 3,6 foizi barcha nomzodlarga qarshi ovoz bergan. Saylovdagi davomad 85,7 foizni tashkil etgan.
Izoh (0)