So‘nggi haftalarda jahon prokatidagi eng qiziqarli yangi filmlarni e’tiboringizga havola etamiz.
“Bo‘ri odam”
Bleykning bolaligi yirtqich odamxo‘r hayvon izg‘ib yuradigan qishloqda o‘tgan. Yillar o‘tib ulg‘aygan Bleyk rafiqasi Sharlotta va qizi Jinjer bilan San-Fransiskoda yashaydi va bedarak yo‘qolgan otasi vafot etgani haqida xabar oladi. U oilasini olib yozda o‘rmonlar va qayg‘uli xotiralar bilan qurshalgan o‘sha uyga borishga qaror qiladi. Ularning mashinasi yetib kelishi bilanoq bahaybat maxluq hujum qiladi. Ammo asosiy tahdid maxluq tishlagan Bleykda boshlanadi. Sharlotta va Jinjer dahshatli darajada o‘zgargan eri va otasi bilan yolg‘iz qolishga majbur bo‘lishadi.
“Yana ishga”
Emili va Mett baxtli er-xotin bo‘lib, ikki farzandini tarbiyalamoqda. Bolalar ota-onalari qachonlardir Markaziy razvedka boshqarmasining maxfiy agentlari bo‘lganidan bexabar, ular oilasi uchun xavfli xizmatdan voz kechgan edi. Emili va Mett vaziyat taqozosi bilan eski ishiga qaytishga majbur bo‘lishganida ular birgalikda yengilmas jamoa ekanliklarini yana bir bor isbotlaydi.
Kemeron Dias karyerasidagi tanaffusdan so‘ng kinoga shaxdam qadamlar bilan qaytdi. “Yana ishga” bu — standart va syujetni oldindan bashorat qilish mumkin bo‘lgan, ammo o‘ziga xos jozibali oilaviy komediya. Filmda Dias va Jeymi Foks tandemini ko‘rish mumkin, qiziqarli voqealar rivoji oilaviy hordiq chiqarish uchun ayni muddao.
“Oqim”
Yer shiddat bilan suv ostida qoladi. Shafqatsiz oqim o‘z yo‘lida uchragan hamma narsani — huvullagan uylarni, daraxtlarni, tog‘larni va qochayotgan hayvonlarni o‘z domiga tortadi. Falokatdan yolg‘iz to‘q kulrang mushuk omon qoladi. Tez orada u o‘rmonda omon qolgan boshqa hayvonlarni uchratadi. Yelkanli qayiq ularni kapibara, yalqov, labrador ko‘ppak va kotib qush yangi sinovlar hamda najot sari olib boradi.
“Oqim” — latviyalik rejissyor Gints Zilbalodisning kam byudjetli multfilmi bo‘lib, u kutilmaganda “Oltin globus”da “Boshqotirma 2” va “Yovvoyi robot” kabi kartinalarni ortda qoldirdi. Bu Nuh kemasi haqidagi o‘ziga xos hikoyadir, faqat endi har bir jonzot juftligi bilan emas — faqat sodiq do‘stlari bilan. Ushbu multfilmning jozibasi uning soddaligi, hayvonlarga berilgan xatti-harakatlar, ovozlar, hissiyotlarning yoqimli tabiiyligidadir.
“Achchiq haqiqat”
Pensi g‘azab, tushkunlik va arzimas ko‘ngilsizlikka nisbatan ham yuqori sezuvchanlikdan aziyat chekadi. Eri va o‘g‘li onasining tanqidiga javoban ortiqcha so‘z aytishdan qo‘rqishadi, ko‘chada notanish odamlar bilan mojarolar osongina janjalga aylanib ketadi, Pensining butun dunyodan shikoyat qilishidan esa deyarli hamma to‘ygan. Ammo Pensining uning butunlay qarama-qarshisi, hayotni sevadigan va quvnoq Shantal ismli singlisi bor. U go‘yoki Pensining qiyin fe’l-atvoriga bardosh bera oladigan va unga chin dildan hamdard bo‘ladigan yagona inson.
“Achchiq haqiqat” britaniyalik yozuvchi Mayk Lining insonning dunyo va yaqinlari bilan munosabatidagi murakkab ruhiy holatini tadqiq etuvchi dramasidir. Bu barcha tushunmovchiliklarga qaramay, odamlarni birlashtiruvchi so‘zsiz muhabbat haqidagi hikoya.
“Jilovlanmas”
Amerikalik kurashchi Entoni Robles hayoti haqidagi hayajonli film uning avtobiografik kitobiga asoslangan. U bir oyoqsiz tug‘ilgan va keyinchalik protezdan voz kechib, usiz ham hayotda o‘z yo‘lini topishni o‘rgangan. Kurashga bo‘lgan kuchli qiziqishi yosh yigitni barcha qiyinchiliklarni insoniy kuch bilan yengib, o‘z ustida tinmay ishlashga undadi. Buning natijasida u milliy chempionatda g‘alabaga erishdi.
Ben Afflekning “Jilovlanmas” filmi — an’anaviy uslubda va ta’sirli tarzda suratga olingan, g‘oyat ilhomlantiruvchi va ruhlantiruvchi hikoya bo‘lib, u Jarrell Jerom ijro etgan qahramonga nisbatan samimiy hamdardlik va hayrat uyg‘otadi. Aytgancha, suratga olish jarayonida Roblesning shaxsan o‘zi Jeromning dublyori sifatida ishtirok etgan. Ikkinchi darajali rollarni Jennifer Lopes, Bobbi Kannavaledan tortib Maykl Penya va Don Chidlgacha bo‘lgan mashhur yulduzlar ijro etgan.
Izoh (0)