Oliy Majlis Qonunchilik palatasining 21-yanvardagi majlisida “Iste’molchilarning huquqlarini himoya qilish to‘g‘risida”gi qonunga qo‘shimcha kiritish to‘g‘risidagi qonun loyihasini birinchi o‘qishda qabul qilindi.
Qonun loyihasi bilan sotuvchi iste’molchiga shartnomada ko‘rsatilgan muddatlarda tovarni topshirmagan taqdirda, majburiyatni bajarilmagan qismiga penya to‘lashi nazarda tutilmoqda.
Ma’lum qilinishicha, sotuvchilarning fuqarolarga tovarlarni kelishilgan muddatda yetkazib bermayotgani bilan bog‘liq murojaatlar tobora ko‘paymoqda. Jumladan, 2022-yilda 500 ta, 2023-yilda 1 373 ta, 2024-yilda esa 1 476 ta murojaat kelib tushgan va bunga amaldagi qonunlarda javobgarlik belgilanmagani ham sabab bo‘lmoqda.
Ana shunday holatlarning oldini olish maqsadida “Iste’molchilarning huquqlarini himoya qilish to‘g‘risida”gi qonunga qo‘shimcha kiritilmoqda va unda tovarlarni kelishilgan muddatda yetkazib bermagan sotuvchilarga javobgarlik belgilash taklif qilinyapti.
Bunda penyaning umumiy summasi yetkazib berilmagan tovar bahosining 100 foizidan oshib ketmasligi, penyani to‘lash shartnoma majburiyatlarini buzgan tarafni tovarlarni yetkazib berish muddatlarini kechiktirib yuborish, to‘liq yetkazib bermaslik oqibatida yetkazilgan zararni qoplashdan ozod etmasligi belgilanmoqda.
Shu bilan birga, sotuvchi tovarlarni iste’molchiga topshirishning kechikishi iste’molchining aybi bilan sodir bo‘lganligini isbotlasa, penya to‘lashdan ozod etilishi ko‘zda tutilmoqda.
Ushbu qonun loyihasi 20-yanvar kuni parlament fraksiyalarida ko‘rib chiqilgan. Unda qonun loyihasining qabul qilinishi aholining qonuniy manfaatlarini iste’molchi sifatida huquqlarini himoya qilish va oldi-sotdi shartnomasiga muvofiq sotuvchi shartlashilgan muddatda yoki muddatlarda tovarlarni iste’molchiga topshirmasligi kabi holatlarning oldini olishga xizmat qilishi qayd etildi.
“Milliy tiklanish” fraksiyasida fraksiya a’zolari iste’molchilar manfaatlaridan kelib chiqib, qonun loyihasini yanada takomillashtirish va maromiga yetkazish bo‘yicha bir qator takliflar berdi. Xususan, fraksiya a’zosi Dilnoza Azizova bu norma fuqarolarga elektr energiya, suv, gazni o‘z vaqtida yetkazib bermagan idoralarga ham qo‘llaniladimi, degan masalani ko‘tardi.
“Shu kunlarda ayrim hududlarda elektr energiyasi va gaz yetkazib berishda uzilishlar kuzatilmoqda. Tegishli idoralar esa bu borada aholini hatto ogohlantirish haqida o‘ylamayapti ham. Bu ham iste’molchilar huquqlarini buzish emasmi?” dedi Azizova.
Qonun tashabbuskorlari ko‘tarilgan savollar bo‘yicha batafsil tushuntirishlar berib, deputatlar tomonidan berilgan asosli takliflar e’tiborga olinishi va qonun loyihasini maromiga yetkazishda inobatga olinishini bildirdi.
Oliy Majlis Qonunchilik palatasi yig‘ilishida ta’kidlanishicha, o‘zgartirishlarning qabul qilinishi iste’molchilarning manfaatlari himoya qilinishini ta’minlaydi va tovarni muddatidan oldin yoki shartnomaviy hajmdan kam miqdorda yetkazib berish holatlarining oldini oladi.
Izoh (0)