Amerikalik aktrisa Kemeron Dias kino sanoatida ishlamagan o‘n yillik tanaffus vaqti hayotining “eng yaxshi yillari” bo‘lganini tan oldi. Bu haqda u The Graham Norton Show dasturida aytib o‘tdi.
“Aytish lozimki, menga bu tanaffus juda yoqdi. Filmlarda suratga tushmagan yillarim hayotimda o‘tkazgan eng yaxshi vaqt bo‘ldi. Men o‘zimni avvalambor ona, rafiqa rolida ko‘rdim va juda baxtli hayot kechirdim”, dedi Dias.
Aktrisaning qo‘shimcha qilishicha, u kino sohasiga qaytganidan ham mamnun. O‘n yillik tanaffusdan so‘ng Dias Netflix striming platformasi tomonidan taqdim etilgan “Back in action” (“Yana ishga”) filmida suratga tushdi.
Kemeron Dias “Shrek 5” filmidagi Fiona obraziga yana bir bor ozov berishni istaydi. Shuningdek, agar Jim Kerri ham ishtirok etsa, 1994-yilda suratga olingan “Niqob” komediyasining davomida suratga tushishga ham darhol rozi bo‘ladi.
Diasning ta’kidlashicha, kino sohasidan uzoqlashish unga oilasi bilan ko‘proq vaqt o‘tkazish va ruhan dam olish imkonini berdi. Aktrisa filmlarda suratga tushishni rad qila boshlaganidan so‘ng bir necha yil unga rollar taklif etilaverdi. Ammo vaqt o‘tib takliflar kelishi to‘xtadi.
Uzoq muddatli tanaffusdan keyin kinoga qaytishni Dias “katta imkoniyat” deb atadi:
“Agar men uni qo‘ldan boy bersam, odamlarga kulgi ulashadigan filmlar yaratishga bo‘lgan ishtiyoqim so‘nib qoladi. Hozirgi imkoniyatdan foydalanmaslik ahmoqlik bilan barobar”, dedi u.
Ma’lumot uchun, 2018-yilda Kemeron Dias kinodan ketishga qaror qilib, oilasi bilan ko‘proq vaqt o‘tkazishni istaganini aytgandi. Diasning ijtimoiy tarmoqlaridagi profili endi uning yulduz emas, balki uy bekasi ekanligini ko‘rsatadi. Profil tavsifida birinchi o‘rinda “ona”, ikkinchi o‘rinda esa “aktrisa” deb yozilgan.
“Kinoda suratga tushayotganingda senga xuddi to‘liq egalik qilishgandek bo‘ladi. Suratga olish maydonchasida kuniga 12 soatlab bir necha oy ishlaysan. Boshqa narsalarga vaqt qolmaydi. Men hayotimning bir qismini boshqa odamlarga berayotganimni angladim. Ular umrimni olib qo‘yishmoqda edi. Shunchaki hayotimni qaytarib olishim, hayotim uchun mas’uliyatni o‘z zimmamga olishim kerakligini tushunib yetdim”, deya tushuntirgan edi Kemeron.
Izoh (0)