Britaniyalik aktrisa Keyt Uinslet Stiven Kolber shousida sigirlarni juda qo‘rqinchli hayvonlar deb hisoblashi haqida aytib berdi.
Uning so‘zlariga ko‘ra, Keyt sigirlar haqida ancha avval turli qo‘rqinchli voqealarni eshitgan, o‘sha kundan boshlab aktrisada noodatiy fobiya paydo bo‘lgan.
Sigirlardan qo‘rqish fobiyasi “bovinofobiya” (bovino — sigir, phobos — qo‘rquv) deb ataladi. Bu fobiya sigirlardan, ularning ko‘rinishidan yoki ular bilan yaqinlashishdan qo‘rquvni o‘z ichiga oladi.
“Menga sigirlarning o‘zini qanday tutishni doim kuzatish va ba’zi holatlarda ehtiyot bo‘lish kerak ekanligi haqida ogohlantirishgan. Masalan, agar sigir dumini silkitib, boshini chayqasa va yaqin atrofida chivinlar bo‘lsa, demak, uning kayfiyati yaxshi emas, degani. Bunday vaqtda hayvon odamlar tomonga yugurib kelishi va ularga tashlanib qolishi mumkin”, dedi Uinslet.
Aktrisaning so‘zlariga ko‘ra, u tez-tez tabiat qo‘ynida, yaylovlarda sayr qilishni hamda tog‘larga chiqishni yaxshi ko‘radi. Ammo yo‘lida sigirlarga duch kelib qolishdan juda ham qo‘rqadi. Kunlarning birida aktrisa onasi bilan sayohatga chiqqan va qoramollardan biri ularning ortidan yugurgan.
“Angliyada sigirlar bilan bog‘liq juda ko‘p dahshatli voqealar bo‘lib o‘tgan, shuning uchun men har doim yaylovlarda hadik bilan yuraman”, deya qo‘shimcha qildi u.
Shu bilan birga, aktrisa o‘zining fobiyasini yengishga harakat qilishi va ichki qo‘rquvini jilovlay olishni o‘rganishi kerakligini ham ta’kidlab o‘tdi.
Izoh (0)