O‘zbekistonda 2025-yil 1-iyuldan boshlab daraxt ekkan kambag‘al fuqarolarga subsidiya berish yo‘lga qo‘yiladi. Bu haqda “2025-yilda aholi bandligini ta’minlash va kambag‘allikni qisqartirish chora-tadbirlari to‘g‘risida”gi prezident qarorida belgilandi.
Hujjatga ko‘ra, “Ekofaol fuqaro” platformasiga daraxt ekkanligi to‘g‘risida maʼlumotlar kiritgan kambag‘al fuqarolarga o‘rmon fondi yerlarida ekilgan har 100 ta daraxt uchun BHMning bir baravari (375 ming so‘m) miqdorida subsidiya ajratish tartibi joriy etiladi. Bunda subsidiya yilda ikkiga bo‘lib (ko‘chatlar ekilgan vaqtda hamda ularning parvarish davridan keyin) teng ulushlarda to‘lanadi.
2025-yilda kambag‘al oila a’zolarini jalb etgan holda 20 ming gektar o‘rmon fondi yerlarida sanoatbop, manzarali va mevali daraxt turlaridan iborat o‘rmonlar barpo etish, ko‘chatxonalar tashkil etish va dorivor o‘simliklar yetishtirish loyihalari amalga oshiriladi. Jami 100 gektar yer uchastkalarida brussonetiya daraxtini yetishtirish bo‘yicha pilot loyihalar amalga oshiriladi.
2025-yil 1-apreldan 2028-yil 1-yanvarga qadar yangi tashkil etiladigan qishloq xo‘jaligi va dorivor o‘simliklarini yetishtirish va qayta ishlash kooperativlari uchun ijtimoiy soliq hamda ularga ishga qabul qilingan jismoniy shaxslardan olinadigan daromad solig‘i stavkalari 1 foiz etib belgilanadi.
Kambag‘al oilalar reyestriga kiritilgan oilalar aʼzolariga qishloq xo‘jaligi kooperativlari ustav fondiga ulush sifatida kiritish uchun Kambag‘allikni qisqartirish davlat maqsadli jamg‘armasi hisobidan BHMning 10 baravarigacha (3 mln 750 ming) miqdorida subsidiyalar ajratiladi.
Izoh (0)