Nukus shahri hokimligi qora marvarid rangli Kia K5 Style avtomobilini xarid qildi. Bu davlat xaridlari portali ma’lumotlarida keltirilgan. Shartnoma 23-dekabr kuni tuzilgan bo‘lib, avtomobilning narxi 492 mln so‘mni tashkil etadi.
Avtomobilni sotib olishga shahar hokimining 23-dekabrdagi farmoyishi asos qilib olingan.
Ushbu farmoyish Adliya vazirligining “E-qaror” yagona elektron tizimi platformasida hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi vaji bilan yashirib qo‘yilgan.
Davlat xaridlari elektron tizimiga biriktirilgan farmoyish nusxasida mavjud ma’lumotlarga ko‘ra, mablag‘ yer uchastkalariga bo‘lgan huquqlarni sotishdan tushgan pullar hisobidan shahar hokimligiga ajratilgan mablag‘ga sotib olinishi belgilangan.
Sotib olish uchun asos sifatida shahar hokimligi balansida bo‘lgan Malibu-2 avtomashinasi 2018-yilda ishlab chiqarilgani, bugungi kunda eskirib, saqlash va ta’mirlash xarajatlari uchun ko‘p miqdorda mablag‘ sarflanayotgani bildirilgan.
Shuningdek, farmoyishda Malibu-2 avtomobilini belgilangan tartibda auksion orqali sotuvga chiqarish nazarda tutilgan. Vaholanki, hokimlikning avtotransport vositalariga taqiq qo‘yilgan.
Boisi MIBdan hokimlikning 6 ta ijro hujjatlari bo‘yicha jami 3 milliard 14 million 975 ming so‘m qarzdorligi mavjud.
Izoh (0)