Kremlda Rossiya prezidenti Vladimir Putin hamda Eron rahbari Mas’ud Pezeshkiyon tomonidan imzolangan ikki davlat o‘rtasidagi keng qamrovli strategik sheriklik to‘g‘risidagi shartnoma xavfsizlik va mudofaa sohasidagi hamkorlikni mustahkamlashni nazarda tutadi. Hujjat Kreml rasmiy veb-saytida e’lon qilingan.
“Agar tomonlardan biri tajovuzga uchrasa, ikkinchi tomon tajovuzkorga tajovuzni davom ettirishga ko‘maklashadigan hech qanday harbiy yoki boshqa yordam ko‘rsatmasligi va yuzaga kelgan kelishmovchiliklar BMT Ustavi hamda xalqaro huquqning boshqa tegishli me’yorlari asosida hal etilishiga ko‘maklashishi shart”, deya ta’kidlanadi shartnomada.
Hujjatda, shuningdek, Moskva va Tehronning bir tomonlama, jumladan eksterritorial xususiyatga ega bo‘lgan majburlov choralarining qo‘llanishiga birgalikda qarshi turishlari ko‘zda tutilgan. Shartnomada bunday choralarning kiritilishi “xalqaro huquqqa zid va do‘stona bo‘lmagan harakat” sifatida baholandi.
“Bitim ishtirokchilari, shuningdek, uchinchi tomon bunday choralarni joriy etishi va kuchaytirishi uchun foydalanishi mumkin bo‘lgan ma’lumotlarning tarqalishini cheklash bo‘yicha choralar ko‘rmoqda”, deya ta’kidlangan hujjatda.
Shartnomaga ko‘ra, milliy xavfsizlikni mustahkamlash va tahdidlarga qarshi kurashish maqsadida “tomonlarning razvedka va xavfsizlik xizmatlari axborot hamda tajriba almashishlari va o‘zaro hamkorlik darajasini yanada oshirishlari” nazarda tutilgan.
Izoh (0)