AQSH prezidenti Jo Bayden giyohvand moddalar bilan bog‘liq jinoyatlarda ayblanganlarning hukmlarini yengillashtirdi.
Oq uy saytida ta’kidlanishicha, bu jinoyatlar zo‘ravonliksiz sodir etilgan. Qariyb 2,5 ming kishining hukmi yumshatildi.
“Kongress tan olganidek, hukmlardagi bu tafovutlarni bartaraf etish vaqti keldi. Bu tarixiy xatolarni tuzatish va munosib insonlarga oilalariga qaytish imkoniyatini berish yo‘lidagi muhim qadamdir”, dedi AQSH rahbari.
Uzoq muddat qamoq jazosiga hukm qilingan fuqarolar, shuningdek, endilikda amal qilmaydigan eski qonunlar bo‘yicha hukm qilinganlar ham afv etildi.
Jo Bayden 23-dekabr kuni 40 nafar o‘lim jazosiga hukm qilingan mahbuslardan 37 nafarining jazosini yengillashtirgan edi. U saylangan prezident Donald Tramp ma’muriyatining “qatl hukmini qayta tiklashiga” yo‘l qo‘ya olmasligini tushuntirdi. 12-dekabr kuni Bayden 1,5 ming nafar kishining jazosini yengillashtirdi, shuningdek, zo‘ravonliksiz jinoyatlar uchun ayblangan 39 nafar mahkumni afv etdi.
Yanvar oyi boshida ikki mahbus prezidentning afvini rad etdi. Mahkumlar hukmning yengillashtirilishi “ularni noqulay ahvolga solib qo‘yishiga” ishonishadi, chunki ular o‘zlariga qo‘yilgan ayblov ustidan shikoyat qilishga urinib, aybsiz ekanliklarini ta’kidlamoqda.
AQSH sudlari o‘lim jazosiga hukm qilinganlar ishi bo‘yicha apellyatsiyalarni kuchaytirilgan tekshiruv doirasida ko‘rib chiqishlari shart. Bu esa ishlarning xatolar bo‘yicha yanada sinchkovlik bilan o‘rganilishini kafolatlaydi. Mahbuslar bu jarayondan voz kechishni istamasliklarini aytishdi.
“Sudlanuvchi faol sud muhokamasida ishtirok etayotgan paytda hukmni yumshatish — uni kuchaytirilgan tekshiruv ko‘rinishidagi himoyadan mahrum etish demakdir. Bu sudlanuvchini uning apellyatsiyasi bekor qilinishiga olib keladigan asosiy adolatsizlik holatiga tushirib qo‘yadi”, deydi Shennon Agofski.
Har ikkala mahbus ham hukmni yengillashtirishni taqiqlash to‘g‘risidagi arizalarida ikkinchi advokat tayinlanishini talab qilmoqda. AQSH Oliy sudining 1927-yildagi qaroriga ko‘ra, prezident mahkumlarning roziligisiz afv e’lon qilishi mumkin.
Izoh (0)