Oliy Majlis Qonunchilik palatasining 14-yanvar kuni bo‘lib o‘tgan majlisida fuqarolar yig‘ini raislari — mahalla raislarining vakolat muddatini uzaytirish to‘g‘risidagi qonun loyihasi uchinchi o‘qishda qabul qilindi.
“O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun loyihasi bilan fuqarolar yig‘ini raisi vakolatlari muddatini 3 yildan 5 yilga o‘zgartirishdan tashqari quyidagilar belgilanmoqda:
- fuqarolar yig‘ini raisi vakolatlari muddatidan ilgari tugatilgan taqdirda bo‘shab qolgan o‘rinlarga yangi saylov o‘tkazish orqali fuqarolar yig‘ini raisini besh yil muddatga saylash tartibini belgilash;
- Senat Kengashining fuqarolar yig‘ini raisi saylovini o‘tkazish bilan bog‘liq vakolatlarini Qoraqalpog‘iston Respublikasi Jo‘qorg‘i Kengesi, xalq deputatlari viloyatlar va Toshkent shahar Kengashlariga o‘tkazish;
- Fuqarolar yig‘inlari raislari saylovini tashkil etish va o‘tkazishga ko‘maklashuvchi respublika komissiyasining fuqarolar yig‘ini raisi saylovini o‘tkazish bilan bog‘liq vakolatlari Fuqarolar yig‘inlari raislari saylovini tashkil etish va o‘tkazishga ko‘maklashuvchi Qoraqalpog‘iston Respublikasi, viloyatlar va Toshkent shahar komissiyalariga o‘tkazish.
Shuningdek, Qoraqalpog‘iston Respublikasi, viloyatlar, Toshkent shahar, tumanlar va shaharlar fuqarolarning o‘zini o‘zi boshqarish organlari faoliyatini muvofiqlashtirish bo‘yicha kengashlarining nomini Qoraqalpog‘iston Respublikasi, viloyatlar, Toshkent shahar, tumanlar va shaharlar mahallani qo‘llab-quvvatlash kengashlari sifatida o‘zgartirish nazarda tutilmoqda.
Majlisda deputat Abdulla Aslanov mahalla raislarining navbatdagi saylovi 2025-yilning may oyida o‘tkazilishi belgilanib, ushbu saylovni tashkil etish bilan bog‘liq xarajatlar davlat byudjeti smetasiga kiritilganini aytdi.
Deputatlarning ta’kidlashicha, mazkur qonun loyihasining qabul qilinishi fuqarolar yig‘inlari raislari faoliyatini hamda fuqarolar yig‘inlari raislari saylovini tashkil etish va o‘tkazishga ko‘maklashuvchi komissiyalar ishini samarali tashkil etilishiga xizmat qiladi. Shuningdek, Qoraqalpog‘iston Respublikasi, viloyatlar, Toshkent shahar, tumanlar va shaharlar mahallani qo‘llab-quvvatlash kengashlarining saylovni tashkil etish va o‘tkazish borasida mas’uliyati oshadi hamda bo‘shab qolgan o‘rinlarga fuqarolar yig‘ini raisi saylovini o‘z vaqtida o‘tkazilishi ta’minlanadi.
2023-yil 21-dekabr kuni prezidentning “O‘zbekiston mahallalari uyushmasi faoliyatini yo‘lga qo‘yish va mahallalarda boshqaruv tizimini takomillashtirishga oid qo‘shimcha chora-tadbirlar to‘g‘risida”gi qarori qabul qilingandi. Qarorda “Fuqarolarning o‘zini o‘zi boshqarish organlari to‘g‘risida”gi qonun yangi tahrirda ishlab chiqilishi, unda mahalla raisining vakolat muddatini 3 yildan 5 yil muddatga uzaytirish va boshqalar nazarda tutilishi belgilangandi.
Izoh (0)