Rossiyaning mashhur sport portali “Manchester Siti” klubiga o‘tishi aniq bo‘lgan Abduqodir Husanovning narxi bir yil ichida keskin oshganiga e’tibor qaratdi.
“Sovetskiy sport” yangiliklar portali O‘zbekiston terma jamoasi himoyachisi Abduqodir Husanov haqida o‘z taassurotlarini bo‘lishdi.
“Atigi bir yarim yil ichida Abduqodir Husanovning narxi 100 ming yevrodan 40 million yevroga ko‘tarildi.
Bir yil ichida narx 400 barobarga oshishi — shunday bo‘lishi mumkinmi? Aftidan, shunday. Abduqodir Husanov – oddiygina talaffuz qilish qiyin ismga ega o‘zbekistonlik futbolchi emas, balki yanvar oyining boshidagi asosiy yangiliklarning qahramonlaridan biri. 2023-yil iyul oyida “Lans” himoyachini Belarusning “Energetik-BGU” klubidan zamonaviy futbol mezonlari bo‘yicha kulgili narx – 100 ming yevroga sotib olgan edi.
Husanovning Fransiya chempionatidagi birinchi mavsumi, ya’ni yangi darajaga moslashish davri unchalik ajoyib bo‘lmadi, lekin yomon ham emas. Ammo o‘shandan beri himoyachi o‘z o‘yinida ulkan progressni namoyish etdi.
Joriy mavsumda Husanov o‘tgan mavsumga qaraganda ko‘proq vaqt maydonda bo‘ldi. Bundan tashqari, uning o‘yin sifati va qaror qabul qilish darajasi sezilarli darajada oshdi. Shu sababli eng kuchli klublar futbolchiga qiziqish bildirishga shoshildi.
Ayni paytda himoyachi Liga 1 da to‘pni olib qo‘yishlar soni bo‘yicha eng yaxshi beshlikdan joy olgan – 26 marta. Bu uning o‘yinni tushunish darajasi yuqori ekanidan dalolat beradi. Shuningdek, u 56 bor hujumlarni “tozalash”da ishtirok etgan. Ko‘pchilik Husanovning ishonchliligini alohida ta’kidlamoqda – joriy mavsumda “Lans” uning xatosidan keyin gol o‘tkazib yubormagan.
Oktyabr oyida u Fransiya chempionatining eng yaxshi yosh futbolchisi deb topildi – bu futbolchining yana bir yutug‘i” – deyiladi maqolada.
O‘zbekiston terma jamoasi hamda “Lans” klubi futbolchisi Abduqodir Husanov “shaharliklar” bilan 2029-yilgacha shartnoma imzolashga kelishib olgani haqida xabar berilgan edi. Transfer summasi — 40 million yevro.
Ma’lumot uchun, “Lans” Husanovni 2023-yil iyul oyida “Energetik-BGU”dan 100 ming yevroga sotib olgandi.
Husanov Fransiya klubi safida 31 ta o‘yinda maydonga tushib, bir marta golli uzatma amalga oshirdi. Uning fransuz klubi bilan tuzgan shartnomasi 2027-yilning iyuniga qadar amal qiladi.
Transfermarkt ma’lumotiga ko‘ra, uning bozor qiymati 12 million yevroga baholangan.
Izoh (0)