Ijtimoiy tarmoqlarda Samarqand viloyati Ishtixon tumanidagi Oqdaryo suv omborida damba yorilgani hamda suv sathi me’yordan oshib ketgani haqida xabarlar tarqaldi. Tuman hokimligi buni rad etdi.
“Oqdaryo suv omborida hech qanday nosozliklar yoki xavfli holat yuzaga kelmagan. Suv sathi me’yoriy darajada bo‘lib, damba va unga tegishli infratuzilmalar barqaror holatda ishlamoqda”, deyiladi tuman hokimligi matbuot xizmati xabarida.
Ta’kidlanishicha, barcha obyektlar doimiy ravishda mutaxassislar tomonidan nazorat qilinmoqda. Oqdaryo suv ombori strategik ahamiyatga ega inshoot sifatida qonunchilikka muvofiq ravishda texnik ko‘rikdan o‘tkazilib, uning xavfsizligi to‘liq ta’minlangan.
Hokimlik fuqarolardan tasdiqlanmagan ma’lumotlarni tarqatmaslikni hamda rasmiy manbalarga tayanishni so‘radi.
13-yanvar kuni Oqdaryo suv omborida yoriqlar paydo bo‘lgani haqida yolg‘on axborot tarqatishda gumonlangan shaxslar ustidan sud bo‘lib o‘tdi. Sud hujjati bilan tanishgan “Gazeta.uz”ning yozishicha, 1988-yilda tug‘ilgan J.H. 2025-yil 10-yanvar kuni Oqdaryo suv omborining janubiy-g‘arbiy qismi qirg‘og‘ida suv ombori ishchi xodimlari tomonidan joriy ta’mirlash ishlarini olib borilayotganini o‘zining telefoniga video tasvirga olgan. Unda “Mana Ishtixon tumani suv omborida suv toshib ketishiga oz qoldi, suv ombor ham ketay dedi” deb, 10-yanvar kuni M.P. bilan birgalikda ijtimoiy tarmoqlar orqali turli guruh va kanallarga tarqatgan.
Ular Ma’muriy javobgarlik to‘g‘risidagi kodeksning 202−2-moddasi 2-qismida (Jamoat tartibiga yoki xavfsizligiga tahdid soluvchi yolg‘on axborotni tarqatish) nazarda tutilgan huquqbuzarlikni sodir etgan deb topildi va har biriga BHMning 20 baravari miqdorida ya’ni 7,5 million so‘mdan jarima jazosi tayinlandi.
Oqdaryo suv ombori haqida
Oqdaryo daryosining o‘zanida joylashgan Oqdaryo suv ombori 1989-yilda foydalanishga topshirilgan. U 7 ballgacha zilzilaga bardosh beradi va 110 million metr kub suv sig‘imiga ega. Suv omborlarida xavfsizlik nuqtai nazaridan doimiy kuzatishlar olib boriladi. Bundan tashqari, ichki ishlar va milliy gvardiya qo‘riqlash bo‘limlari tomonidan omborlar doimiy qo‘riqlanadi. Oqdaryo suv omboriga 2011-yilda 8 ta videokuzatuv moslamasi, 2015-yilda 5 ta tashvishli chaqiruv tugmasi o‘rnatilgan va bu yerda ham zamonaviy elektrostansiya va “S-40” sirenasi mavjud.
Izoh (0)