Avvalroq Toshkent shahridagi Prezident maktabi barqaror rivojlanish bo‘yicha Shayx Zoid al Nahayon nomidagi nufuzli mukofotning “Global o‘rta maktablar” nominatsiyasida g‘olib deb topilgani haqida xabar berilgandi. Prezident yordamchisi Saida Mirziyoyeva o‘quvchilarini tabrikladi.
“Ta’lim tizimimizning yutuqlari xalqaro maydonda yana bir bor e’tirof etildi. Toshkent shahridagi Prezident maktabi Shayx Zoid Ol Nahayon nomidagi nufuzli mukofotning “Global o‘rta maktablar” nominatsiyasida g‘olib deb topildi.
Maktab o‘quvchilari Pahlavon G‘ulomov va Asilbek Ashrapov hamda ularning ustozi Sohibxon Azizovning yomg‘ir suvini ichishga yaroqli darajagacha qayta ishlash loyihasi g‘alabani qo‘lga kiritdi”, deb yozadi Saida Mirziyoyeva.
Qayd etilishicha, tanlovga 156 ta davlatdan jami 5980 ta ariza kelib tushgan edi. Bugun Abu-Dabida mukofotni o‘quvchilarga Birlashgan Arab Amirliklari prezidenti Shayx Muhammad bin Zoid Ol Nahayon shaxsan topshirdi.
“Yoshlarimizning bu ajoyib muvaffaqiyati barchamizga g‘urur va iftixor bag‘ishlaydi, shuningdek, prezidentimiz tanlagan barqaror va yashil rivojlanish yo‘li naqadar to‘g‘ri ekanligini yana bir bor tasdiqlaydi.
Biz o‘quvchilarimizga yanada yuksak yutuqlar va yangi zafarlar tilaymiz!”, deb yozgan prezident yordamchisi.
Izoh (0)