Chilining Penaflor kommunasidagi stadionda yuz bergan otishma oqibatida 11 yoshli bola halok bo‘ldi. Bundan tashqari, 33 yoshli erkak yaralangani xabar qilinmoqda. Unga kamida yetti marta o‘q uzilgan.
Bu haqda 24Horas nashri xabar berdi.
Hodisa mahalliy maydonda futbol o‘yini chog‘ida sodir bo‘lgan, u yerda muxlislar o‘rtasida janjal ro‘y bergan. Shundan keyin stadionga noma’lum odamlar o‘tirgan mashina yetib kelgan va otishma boshlangan.
Ma’lumotlarga ko‘ra, 11 yoshli bolaga uchta o‘q tekkan. U tibbiy muassasaga olib ketilayotganda yo‘lda vafot etgan. Yana bir erkak esa og‘ir tan jarohatlari bilan kasalxonaga yotqizilgan.
Mahalliy politsiya hodisa sabablarini aniqlash va aybdorlarni topish uchun tergov ishlarini boshladi, deya xabar qildi 24Horas nashri.
1-yanvar kuni kechqurun Nyu Yorkning Kvins tumanidagi tungi klub oldida sodir bo‘lgan otishmada 10 kishi yaralangandi.
ABC News xabariga ko‘ra, bir guruh erkaklar klub tashqarisida navbatda turgan 15 ga yaqin odam tomonga qarata o‘t ochgan. Yaralanganlarning barchasi 16 yoshdan 20 yoshgacha bo‘lgan yigitlar, deydi politsiya.
Shuningdek, 1-yanvar kuni Chernogoriyaning Setinye shahri chekkasidagi barda otishma sodir bo‘lgan.
Barda o‘tirgan erkaklardan biri atrofdagilarga qarata o‘t ochdi, so‘ng ko‘chaga chiqib, o‘tkinchilarga qarata o‘q otishni boshladi. Oqibatda kamida 12 kishi halok bo‘ldi, dedi mamlakat ichki ishlar vaziri Danilo Saranovich.
Izoh (0)