Ertaklarda qurbaqalar shahzodaga aylanadi, lekin real hayotda buning aksi bo‘lsa-chi? Ma’lum bo‘lishicha, yangi qurbaqa turi shahzoda Charlz ismi bilan atalgan ekan. Quyida turli hasharot va hayvonlarga nomi berilgan mashhur insonlar haqida so‘z yuritamiz.
Teylor Svift
2022-yil aprel oyida New York Post nashrida Appalachi tog‘larida topilgan qirqoyoq haqida xabar qilingan. Yangi turdagi hasharot Gremmi mukofotiga sazovor bo‘lgan pop yulduz Teylor Svift sharafiga Nannaria swiftae deb nomlangan.
Beyonse
2012-yilda Avstraliyadagi Ilmiy-sanoat tadqiqotlari hamdo‘stligi (CSIRO) tomonidan noma’lum turdagi so‘na (qon so‘ruvchi yirik pashsha) xonanda Beyonse sharafiga Scaptia (Plinthina) beyonceae deb nom atalgan.
Tobi Maguayr
Beyonse xira pashshaga qiyoslanganidan xursand bo‘lganmi yoki yo‘qmi, bilmaymiz, lekin O‘rgimchak odam rolini ijro etgan aktyor Tobi Maguayrning real hayotda o‘z o‘rgimchagiga ega bo‘lgani o‘rinli ko‘rinadi.
2015-yilda araxnologlar Yuriy M. Marusik va Alireza Zamani aktyor obrazi sharafiga Eronda topilgan yangi o‘rgimchak Filistata maguirei deb nomlandi.
Jennifer Lopes
Entomology Today nashriga ko‘ra, 2014-yilda Puerto Rikoda kananing yangi turini kashf etgan tadqiqot guruhi hasharotni Litarachna lopezae deb nomladi. Ularning so‘zlariga ko‘ra, Jennifer Lopes qo‘shiqlari va kliplari jamoani doimo yaxshi kayfiyatda ushlab turgani uchun hasharotni aynan Lopes sharafiga nomlashga qaror qilishgan.
Anjelina Joli
2013-yilda Alabama shtatidagi Obern universitetidan Jeyson Bond o‘rgimchaklarning bir nechta yangi turlarini aniqlagan va ulardan birini aktrisa Anjelina Joli sharafiga Aptostichus angelinajolieae deb nomlashga qaror qilgan, deb yozadi CBS News.
Bred Pitt
2016-yilda bir guruh olimlar Janubiy Afrikada topilgan parazit arining yangi turiga aktyor nomi berilgan va hasharot Conobregma bradpitti deb nomlangan.
Shakira
Hasharotlar dunyosida Shakira Pitt bilan qarindosh bo‘lib chiqdi. 2014-yilda topilgan parazit arilarning yana bir turi kolumbiyalik qo‘shiqchi sharafiga Aleiodes shakirae nomi berildi. Ma’lum bo‘lishicha, bunday arining chaqishi ipak qurtini qattiq tebratib yuboradi, uning bunday harakati esa tadqiqotchilarga xonandaning mashhur raqsini eslatgani bois shunday nomlangan.
Keyt Uinslet
The Guardian nashrining yozishicha, entomolog Terri Ervin 2002-yilda Kosta-Rikada topilgan zaharli qo‘ng‘izining yangi turini aktrisa Keyt Uinslet nomi bilan atagan. Hasharot Agra katewinsletae deb nomlanadi.
Sting
1994-yilda Kolumbiyada qurbaqaning yangi turi aniqlangandan so‘ng, Michigan universitetidan Moises Kaplan tropik o‘rmonlarni saqlab qolishda xonandaning mehnatini e’tirof etib, qurbaqani Hyla stingi (yoki Dendropsophus stingi) deb nomladi.
Leonardo Di Kaprio
Aktyor ekofaol va tabiatni muhofaza qiluvchi ko‘ngilli inson sifatida ham tanilgan, shuning uchun ko‘plab turdagi hayvon va hasharotlar uning sharafiga atalgan, masalan, qo‘ng‘izlar Grouvellinus leonardodicaprioi va Metallactus dicaprioi, o‘rgimchaklar Misumessus dicaprioi va Spintharus leonardica deb nomlangan.
Izoh (0)