PFL klublarga qulaylik yaratish maqsadida reglamentning “Superliga va Proliga reglamenti”ning 17-bobini tushunarli ko‘rinishga keltirdi. Yangi mavsumda klub libos dizaynini ishlab chiqayotganda mazkur talablarga e’tibor qaratishi lozim bo‘ladi.
Reglamentga ko‘ra, 2025-yildan boshlab har qanday klub o‘z muxlislari ko‘z o‘ngidagi uy uchrashuvida asosiy libosda maydonga tushishi talab etiladi. O‘tgan mavsumlar davomida bu jihat murabbiylar kayfiyati yoki ularning ayrimlari amal qiladigan irimlardan kelib chiqishi oqibatida uchrashuv komissarlari qator qiyinchiliklarga duch keldi. Shundan kelib chiqib, har bir klub o‘z maydonida qanday libosda harakat qilishi masalasini mavsum avvalida hal qilib olishi va uni mavsum so‘ngiga qadar o‘zgartirmasligi talabi reglamentdan joy oldi. Bu o‘z navbatida sevimli jamoasi ishtirokidagi uy o‘yiniga tashrif buyurayotgan ishqibozlar uchun ham qulaylikka olib keladi.
Shuningdek, futbolchi o‘z litsenziyasida ko‘rsatilgan raqamli futbolkada o‘yinga qo‘yiladi. Har qanday klub mazkur masalaga professional nuqtai nazardan yondashishi, o‘zining U21 va U19 jamoalari uchun ham asosiy tarkibniki kabi liboslar taqdim etishi muhim ahamiyat kasb etadi. Bunday holatda keyinchalik asosiy tarkibga jalb etiladigan futbolchida o‘z libosi hamda raqami bilan Superliga yoki Proliga bellashuvida maydonga tushish uchun imkoniyat bo‘ladi.
Liboslar va undagi yozuvlar rangida ham o‘zgarishlar bor. Unga ko‘ra, barcha yozuvlar bir xil rangda bo‘lishi kerak. Och rangli futbolkada tilla rangli yozuvlardan foydalanish mumkin emas.
Bundan tashqari, tashkilot futbolchilarning ism-familiyasi o‘zbek tilida yozilishini talab qilish huquqiga ega bo‘ladi.
Izoh (0)