Eron prezidenti Mas’ud Pezeshkiyon rossiyalik hamkasbi Vladimir Putin bilan keng qamrovli strategik sheriklik to‘g‘risidagi shartnomani imzolash uchun yaqin kunlarda Moskvaga boradi.
Ma’lum bo‘lishicha, ushbu uchrashuv arafasida Eron oliy rahbarining maslahatchisi Rossiyaga yashirin tashriflar bilan bir necha bor borgan, u yadroviy dasturni amalga oshirishda yordam so‘ragan bo‘lishi mumkin.
Eron oliy rahnamosi Oyatulloh Ali Xomanaiyning katta maslahatchisi Ali Larijoniy Rossiyaga bir necha bor yuqori martabali amaldorlar bilan uchrashish maqsadida uchib kelgan, u yadro dasturini amalga oshirish va havo hujumidan mudofaa tizimini mustahkamlashda yordam olishga harakat qilgan, deb yozadi The Times.
G‘arb razvedkasi vakilining The Times’ga ma’lum qilishicha, “ularning strategik munosabatlari chuqurlashgani va Rossiya Eron raketalari hamda dronlariga qaram bo‘lgani sababli Moskva Eron yadroviy dasturiga nisbatan ilgari o‘rnatilgan qizil chiziqlarni kesib o‘tishga tayyorligidan xavotirlar mavjud”.
Kreml matbuot xizmati Pezeshkiyon joriy yilning 17-yanvar kuni rasmiy tashrif bilan Rossiyaga kelishini xabar berdi.
Ikki tomonlama hamkorlikni yanada kengaytirish istiqbollari, shu jumladan savdo-investitsiya, transport-logistika va gumanitar sohalarda, shuningdek, mintaqaviy va xalqaro kun tartibining dolzarb masalalari muhokama qilinishi kutilmoqda. Muzokaralar yakunida Putin va Pezeshkiyon Rossiya va Eron o‘rtasida keng qamrovli strategik sheriklik to‘g‘risidagi shartnomani imzolaydi.
Eronga bombani yaratishda yordam kerak bo‘lmasa-da, u “Rossiya bilan yashirin hamkorlikdan, shubhasiz, manfaatdor,” deb hisoblaydi yadro qurolini tarqatmaslik bo‘yicha NATOning sobiq direktori Uilyam Alberg.
MAGATEning baholashicha, agar Eron uranni atom bombasidan foydalanish uchun zarur darajada boyitishga kirishsa, u bir necha kun yoki hafta ichida kerakli miqdordagi materialga ega bo‘lishi mumkin. Albergga ko‘ra, yetkazib berish vositalari bilan bog‘liq muammolar ko‘proq. Qurolning qolgan qismini tayyorlash va uni mos keladigan raketaga, masalan, ballistik raketaga joylashtirish uchun bir necha oydan bir yilgacha vaqt ketishi mumkin.
Bundan tashqari, G‘arb razvedka manbalarining ma’lum qilishicha, Eron o‘z harbiy-havo kuchlarining jangovar imkoniyatlarini kengaytirish uchun Su-35 qiruvchi samolyotining eng so‘nggi versiyasini sotib olishga intilmoqda; hatto bunday samolyotlar allaqachon xarid qilingani to‘g‘risida xabarlar ham bor.
Tehron, shuningdek, o‘tgan yili Isroil tomonidan zarbalar paytida yo‘q qilingan havo hujumidan mudofaa tizimlarini tiklash niyatida.
Izoh (0)