Kurskda qora niqob taqqan, bolg‘a bilan qurollangan 16 yoshli o‘smir maktabga bostirib kirdi.
Bu haqda Kursk viloyati gubernatori Aleksandr Xinshteyn ma’lum qildi. Uning so‘zlariga ko‘ra, maktab qorovuli “negadir o‘smirni to‘xtata olmagan”.
“U binoga yugurib kirib, yo‘lakdagi bitta oynani sindirgan. Shundan so‘ng, ta’qiblarga qaramay, to‘siqsiz ko‘chaga otilib chiqqan va bir vaqtning o‘zida old eshik oynasini bolg‘a bilan sindirgan. Qochib ketayotib ikkita pichoq va bir shisha yonuvchi suyuqlik solingan sumkani uloqtirib yuborgan. Butun hodisa 2 daqiqadan ko‘proq vaqtni oldi, deydi Xinshteyn.
O‘smir keyinroq qo‘lga olingan. Xinshteynning so‘zlariga ko‘ra, qo‘lga olingan shaxs boshqa maktab o‘quvchisi bo‘lib, “54-sonli maktabda o‘qiydigan o‘quvchi qiz bilan o‘zaro munosabatda” bo‘lgan.
Chelyabinskdagi hodisa
16-sentyabr kuni Rossiyaning Chelyabinsk shahridagi 68-maktabda bolg‘a bilan qurollangan o‘smir o‘quvchi va o‘qituvchilarga hujum qilgandi.
Hodisa oqibatida to‘rt kishi jarohatlangan, ular orasida bir nafar o‘qituvchi ham bor. Hujum sodir etgan 7-sinf o‘quvchisi o‘ziga ham jarohat yetkazgan. U huquq-tartibot idoralari xodimlari tomonidan qo‘lga olinib, tergovga tortilgan.
Xorvatiyadagi maktabga uyushtirilgan hujum
20-dekabr kuni Xorvatiya poytaxti Zagrebning Prechko tumanidagi maktabga hujum uyushtirildi. Pichoq bilan qurollangan o‘smir maktabga bostirib kirib, yetti nafar o‘quvchi va o‘qituvchini yaraladi.
HRT telekanali maʼlumotlariga ko‘ra, hujum qilgan shaxs o‘sha maktab o‘quvchisi bo‘lgan. Telekanalning taʼkidlashicha, jarohat olgan o‘quvchilardan biri vafot etgan.
Izoh (0)