“Vest Hem Yunayted” bosh murabbiyi Xulen Lopetegi kecha, 8-yanvar kuni ishdan bo‘shatildi. Bu haqda klub rasmiy saytida ma’lum qilindi.
“2024—25-yilgi mavsumning birinchi yarmi klub maqsadlariga mos kelmagani bois choralar ko‘rishga qaror qilindi. Rahbariyat Xulen va uning jamoasiga “Vest Hem Yunayted”dagi mehnatlari uchun minnatdorlik bildiradi va ularga kelajakda muvaffaqiyat tilaydi. Ayni paytda klubda yangi murabbiyni tayinlash jarayoni davom etmoqda”, deyiladi rasmiy bayonotda.
Ma’lumot uchun, Xulen Lopetegi 2024-yilning 1-iyulida “Vest Hem Yunayted” bosh murabbiyi lavozimiga tayinlangan edi. U bu lavozimda klubni tark etgan Devid Moyesni almashtirgan edi. Ushbu davr mobaynida murabbiy jamoa bilan 22 ta uchrashuv o‘tkazdi. Ularning 7 tasida g‘alaba qozondi, 5 tasida durang o‘ynadi va 10 uchrashuvda mag‘lub bo‘ldi.
Avvalroq ommaviy axborot vositalarida tarqalgan xabarlarga ko‘ra, Xulen Lopetegining o‘rnini sobiq “Chelsi” bosh murabbiyi Grem Potter egallashi mumkinligi aytilgan.
Izoh (0)