Londonning “Tottenhem” klubi yarim himoyachi Rodrigo Bentankurning Angliya Liga Kubogi yarim finalining birinchi o‘yinida “Liverpul”ga qarshi uchrashuvda olgan jarohatidan keyingi holati haqida rasmiy bayonot berdi.
“Rodrigoning hushida ekani, gaplasha olayotgani va qo‘shimcha tekshiruvlar uchun shifoxonaga yo‘l olganini tasdiqlaymiz”, deyiladi klub matbuot xizmatining rasmiy saytida e’lon qilingan bayonotida.
Jarohat olgan futbolchi shifoxonada ijtimoiy tarmoqlardagi sahifasida holati haqida post qoldirdi. U postga fotosurat joylashtirib, shunday deb yozdi:
“Hammasi joyida! Xatlaringiz uchun rahmat! G‘alaba bilan tabriklayman”.
Ma’lumot uchun, uchrashuvning 7-daqiqasida, burchak to‘pi o‘ynalgan vaqtda Bentankur bo‘yni bilan yerga noqulay tushib, jarohat olgan. Shifokorlar unga bir necha daqiqa yordam berdi. Bentankur mustaqil ravishda o‘rnidan tura olmadi va uni zambilda maydondan olib chiqishga majbur bo‘lishdi.
Ushbu uchrashuvda “Tottenhem” “Liverpul”ni minimal (1:0) hisobda yengdi. Javob bellashuvi 6-fevral kuni “Enfild”da bo‘lib o‘tadi.
Izoh (0)