Kichik yoshida katta yoshdagi aktyorlar uchun ham orzu bo‘lgan mashhurlikni qo‘lga kiritgan bolakaylar o‘zbek kinosida ham topiladi. Jurnalist Nargizaxon Murodova tomoshabinlar ko‘nglidan joy olgan mashhur “bolalar”ning san’at olamiga kirib kelishi va ayni kunlarda nimalar bilan bandligiga qiziqdi.
“Maftuningman”dagi Muhabbat
Muhabbat To‘laxo‘jayeva — O‘zbekiston xalq shoiri Turob To‘laning farzandi. U suratga tushgan “Maftuningman” filmi ham aynan shoirning qalamiga mansub ssenariy asosida suratga olingan. Muhabbatning filmda suratga tushishini undan ham ko‘ra ko‘proq yaqinlari xohlashgan. Uning ukasi Nozim To‘laxo‘jayev — mashhur aktyor. Muhabbat aktrisa bo‘lmasa-da, u O‘zbekistondagi eng ko‘zga ko‘ringan teatrshunoslardan biri. San’atshunoslik fanlari doktori bo‘lgan Muhabbat To‘laxo‘jayeva bir necha yildan buyon O‘zbekiston davlat san’at va madaniyat institutida talabalarga saboq beradi.
“Abdullajon” filmidagi bosh qahramon
Shuhrat Qayumov taniqli operator Temur Qayumovning farzandi hisoblanadi. U kinodagi ilk rolini “Abdullajon” filmida yaratgan. Rejissyor Zulfiqor Musoqov “O‘zbekkino” hovlisida Temur Malikovning o‘g‘lini uchratib qoladi. Mana shu tasodifiy uchrashuv sabab Abdullajon roli Shuhrat Qayumovga nasib etgan. U “Abdullajon”dan so‘ng boshqa o‘zbek filmlarida suratga tushmadi. Maktabni tamomlagach, Toshkent irrigatsiya va qishloq xo‘jaligini mexanizatsiyalash muhandislari institutida tahsil oldi. 1998-yilda tajriba oshirish maqsadida chet elga ketgan va bir necha yil Qozog‘iston va Rossiyada yashagan. U Rossiyada suratga olingan loyihalarda operator sifatida ishlagan. 2003-yili O‘zbekistonga qaytib, o‘z kompaniyasiga asos solgan. Uning kompaniyasi kinotexnikalarni sotish va ijaraga berish bilan shug‘ullanadi. Oilali, 2 o‘g‘il va bir qizning otasi.
Jalol Yusupov 15 yildan buyon AQShda
Jalol Yusupov — “Suyunchi” va “Chinor ostidagi duel” filmlaridagi epizodik rollari bilan yaxshi tanish. Ammo u ilk marta 1978-yili rejissyor Ahror Akbarxo‘jayev suratga olgan “Shaffof kalitchalar” bolalar filmida Ali rolini ijro etgan. Bir yildan so‘ng mashhur rejissyor Melis Abzalovning “Chinor ostidagi duel” filmi uchun o‘tkazilgan kastingda ishtirok etadi. Bu film “Suyunchi” filmida suratga tushishiga asos bo‘ladi. U avval aktyorlik, undan so‘ng rejissyorlik sohasi bo‘yicha tahsil olgan. Aktyor shu kungacha “Sardor”, “Baxt uchun million”, “Qasos”, “Arosat” va “Aldangan ayol” singari ko‘plab kino va seriallarda ham suratga tushgan. U 1991–2006-yillarda O‘zbekiston yoshlar teatrida aktyor va rejissyor sifatida faoliyat yuritgan. Undan so‘ng oilasi bilan Nyu York shahriga ko‘chib o‘tgan.
“Kichkina tabib”dagi yashirilgan sir...
Bolaligidan qo‘shiqchi bo‘lishni niyat qilgan Dilshodbek Kattabekov kutilmaganda aktyorlik sohasiga qadam qo‘ygan. Besh yoshidan boshlab davlat tadbirlarida ishtirok etish uchun Toshkentga kelgan Dilshodning yaqinlariga “Kichkina tabib” filmining kastingida ishtirok etishni taklif qilishadi. Doniyor roliga talabgorlar nihoyatda ko‘p bo‘lgan.
Yuzdan ortiq ishtirokchilar orasidan tanlab olingan Dilshodbek Kattabekov kino olamiga dadil qadamlar bilan kirib keldi. Ba’zi ma’lumotlarda aktyor o‘sha paytda 5 yoshda bo‘lgani aytiladi, bizning hisob-kitoblar esa Dilshodbek Kattabekov “Kichkina tabib” filmida 8 yoshida suratga tushganini tasdiqlaydi.Dilshodbek Kattabekov O‘zbekiston davlat san’at va madaniyat institutining bakalavr va magistratura bosqichlarida tahsil olgan. “Muhabbat sinovlari”, “Xavfli burilish”, “Vijdon” va “Fidoyilar” kabi qator filmlarda muvaffaqiyatli rollarni ijro etgan. Ayni kunlarda diniy-axloqiy roliklarga rejissyorlik qilmoqda.
“Kichkina tabib”dagi Nigora AQShda oila qurgan
Barno Nishonova “Kichkina tabib” filmidagi Nigora roli bilan tomoshabinlarga yaxshi tanish. Ammo uning rolga qanday tasdiqlangani haqida hech qanday ma’lumotga ega emasmiz. Boisi u ancha yillardan buyon AQShda oilasi bilan yashaydi.
O‘zbekistonda xizmat ko‘rsatgan yoshlar murabbiyi Munavvar Abdullayevaning bergan ma’lumotlariga ko‘ra, Barno Nishonova fortepiano yo‘nalishi bo‘yicha tahsil olgan va bir muddat O‘zbekiston davlat san’at va madaniyat institutida ham ishlagan. Uning turmush o‘rtog‘i ham musiqa bilan shug‘ullanadi. Ular bolalarga fortepiano chalish bo‘yicha saboq berishadi. Barno Nishonovaning ikki nafar qizchasi bor.
Xadicha Imomnazarova operani tanlagan
Xadicha Imomnazarova xususiy filmlardagi katta-kichik rollari bilan tomoshabinlarga yaxshi tanish. U ilk rolini 2007-yil suratga olingan “Zumrad va Qimmat” filmida ijro etgan. Undan so‘ng “Nortoy”, “Oshiqlar” va “Men yulduzman” kabi filmlarda suratga tushgan. Ammo u aktrisa bo‘lishni istamadi va akademik xonandalik yo‘nalishini tanladi. U bir necha yildan buyon opera ijrochiligi bilan shug‘ullanadi. 2019-yilda “Nihol” nomidagi davlat mukofotini ham qo‘lga kiritgan.
“Chol va nabira”dagi G‘anisherni negadir rollarga chaqirishmayapti
Ma’ruf Sharipov “Chol va nabira” filmidagi G‘anisher roli bilan tomoshabinlarga yaxshi ma’lum. Bolalikdan qo‘shiq aytishga qiziqqan Ma’ruf bobosi sabab “Tomosha” guruhiga qatnaydi. Bir kuni mashg‘ulotga “O‘zbekkino”dan bir guruh ijodkorlar kelib, 5-6 yoshdagi bolalar bilan suhbatda bo‘lishadi. Chunki dramaturg Rixsivoy Muhammadjonov ilk rejissyorlik ishi — “Chol va nabira” filmini suratga olish niyatida edi. Ma’ruf Sharipov kastingdan o‘tib, 6 yoshida Po‘lat Saidqosimov bilan suratga tushadi. Undan so‘ng “Enagalar”, “Umid” va “Tubanlik” kabi filmlarda kichik rollarni ijro etdi. 19 yoshni qarshilagan Ma’ruf Sharipov yaxshi rollarga chaqirishmayotganini, agar shunday taklif bo‘lsa, yana filmlarda suratga tushishini ma’lum qildi.
Izoh (0)