Xonanda Botir Qodirov otasi Sherali Jo‘rayevning “Bandaman” qo‘shig‘ini qayta kuylab, uni YouTube tarmog‘iga joylashtirgan edi. Qo‘shiq bir necha soat ichida platformada mualliflik huquqi buzilganlik vaji bilan bloklangan.
Botir Qodirov: “Endi meros huquqimdan foydalanaman”
Yangi yilning ilk kunida Botir Qodirov otasi Sherali Jo‘rayevning “Bandaman” qo‘shig‘ini kuylagan videosi YouTube’ga joylashtirilgandi. Xonanda kecha Instagram sahifasida ma’lum qilishicha, aka-uka Jo‘rayevlar tomonidan Botir Qodirov ijrosidagi “Bandaman” qo‘shig‘i videosi mualliflik huquqini buzganlik shikoyati bilan YouTube platformasidan blok qilingan.
Botir Qodirov bu holatdan achchiqlanib, Jo‘rayevlarga o‘z huquqlaridan foydalangan holda “javob qaytarmoqchi”. Bu haqida xonanda Instagram sahifasida shunday yozdi:
“Jo‘rayevlardan navbatdagi blok. Endi meni blok qildinglarmi? Yaxshi, unda men ham sizlarni blok qilaman, bunga mening ham haqqim bor! YouTube’dagi ko‘p sonli, to‘xtovsiz davom etayotgan bloklar sababli endi meros huquqlarimdan foydalanishga majbur bo‘laman”.
“Ovoz bolalar” ortidagi mojaro
Botir Qodirov o‘zi ustozlik qilayotgan “Ovoz bolalar” loyihasidagi ishtirokchilarga Sherali Jo‘rayevning “Bandaman” va “Atirgulim” qo‘shiqlarini o‘rgatib, ularga marhum san’atkorning qo‘shig‘ini aytish huquqini bergandi. Bu holat minglab muxlislar tomonidan iliq kutib olinganiga qaramay, aka-uka Jo‘rayevlar “Ovoz bolalar” loyihasi tomonidan YouTube’ga yuklangan yosh bolalarning videosini ham bloklagani haqida Botir Qodirov ma’lum qildi.
“Menga shuncha yil taqiq qo‘ydinglar, indamadim. Bolalarda nima ayb? Men istagan odamimga otamning qo‘shig‘ini bir marta aytish huquqini bera olaman. YouTube’da bloklagan videolarni blokdan chiqarib qo‘ying, mening yo‘limda turmang”, deya agar shu holatga barham berilmasa, o‘zi ham merosxo‘rlik huquqlaridan foydalanishini aytgan.
Botir Qodirovning so‘zlariga ko‘ra, u hali Sherali Jo‘rayevning moddiy va ma’naviy merosidan o‘z ulushini olmagan.
Izoh (0)